gali-kuchon ka zehn-o-dil mein ek naqsha bana rakhna

galī-kūchoñ kā zehn-o-dil meñ ik naqsha banā rakhnā

zabānī yaad apne yaar ke dar kā pata rakhnā

maraz kāfūr hogā bas hamāre paas baiTho tum

ki chārāgar ne bolā hai qarīb apne davā rakhnā

koī mafhūm le kar bāñdh lo tum she'r meñ apne

bahut mushkil nahīñ hai qāfiye kā qāfiya rakhnā

tumheñ jis se mohabbat hai use dil meñ basā lo tum

magar merī mohabbat ke liye thoḌī jagah rakhnā

kisī bhī haal meñ phir sabr kā dāman na chhūTegā

basā kar dosto siine meñ jang-e-karbalā rakhnā

samajh jāoge tum bhī zindagī kī kyā haqīqat hai

nadī kī dhaar par kuchh der bas kachchā ghaḌā rakhnā

jo paanā chāhte ho 'ishq kī manzil miyāñ 'ilyās'

mirī maano purāne 'āshiqoñ se rābta rakhnā

gali-kuchon ka zehn-o-dil mein ek naqsha bana rakhna

zabani yaad apne yar ke dar ka pata rakhna

maraz kafur hoga bas hamare pas baiTho tum

ki chaaragar ne bola hai qarib apne dawa rakhna

koi mafhum le kar bandh lo tum she'r mein apne

bahut mushkil nahin hai qafiye ka qafiya rakhna

tumhein jis se mohabbat hai use dil mein basa lo tum

magar meri mohabbat ke liye thoDi jagah rakhna

kisi bhi haal mein phir sabr ka daman na chhuTega

basa kar dosto sine mein jang-e-karbala rakhna

samajh jaoge tum bhi zindagi ki kya haqiqat hai

nadi ki dhaar par kuchh der bas kachcha ghaDa rakhna

jo pana chahte ho 'ishq ki manzil miyan 'ilyas'

meri mano purane 'ashiqon se rabta rakhna