gali mein husn ki jo naqsh-e-pa chamakta hai

galī meñ husn kī jo naqsh-e-pā chamaktā hai

hamāre ishq hī kā martaba chamaktā hai

isī liye to mujhe niiñd hī nahīñ aatī

tamām raat koī ḳhat khulā chamaktā hai

hazāroñ shaah jo jhukte haiñ sāmne us ke

kisī faqīr kī jholī meñ kyā chamaktā hai

ka.ī dinoñ se ye aalam hai dard kā dil meñ

kisī mazār pe jaise diyā chamaktā hai

maiñ aañkh muuñd ke hī us ko yaad kartā huuñ

mujhe pata hai ki merā ḳhudā chamaktā hai

kabhī jo ḳhvāb meñ aatī hai us kī parchhā.ī

hamārī aañkh meñ ik aa.ina chamaktā hai

usī kā qāfila paatā hai manziloñ kā pata

ġhubār-e-rāh meñ jo rahnumā chamaktā hai

tamām sadiyoñ ne sīñchā hai apne ashkoñ se

usī ke nuur se dāman mirā chamaktā hai

kashish ye kaisī hai lafzoñ meñ kis kā jalva hai

'nadīm' aap kī ġhazloñ meñ kyā chamaktā hai

gali mein husn ki jo naqsh-e-pa chamakta hai

hamare ishq hi ka martaba chamakta hai

isi liye to mujhe nind hi nahin aati

tamam raat koi KHat khula chamakta hai

hazaron shah jo jhukte hain samne us ke

kisi faqir ki jholi mein kya chamakta hai

kai dinon se ye aalam hai dard ka dil mein

kisi mazar pe jaise diya chamakta hai

main aankh mund ke hi us ko yaad karta hun

mujhe pata hai ki mera KHuda chamakta hai

kabhi jo KHwab mein aati hai us ki parchhai

hamari aankh mein ek aaina chamakta hai

usi ka qafila pata hai manzilon ka pata

ghubar-e-rah mein jo rahnuma chamakta hai

tamam sadiyon ne sincha hai apne ashkon se

usi ke nur se daman mera chamakta hai

kashish ye kaisi hai lafzon mein kis ka jalwa hai

'nadim' aap ki ghazlon mein kya chamakta hai