gali mein ishq ki chala to husn ka fusun chala

galī meñ ishq kī chalā to husn kā fusūñ chalā

fareb khā ke aadmī vahāñ se sar-nigūñ chalā

rahā vo saath jab talak mahak rahī thī rahguzar

hamāre saath saath jaise lashkar-e-sukūñ chalā

nibhā sakī na saath āshiqoñ kā kā.enāt bhī

qadam qadam milā ke sirf jazba-e-junūñ chalā

taḌap uThī hai tishnagī laboñ pe mere is qadar

na aa.e jaam mujh talak ye daur meñ na yuuñ chalā

mujhe huā yaqīn apne ishq ke shabāb par

jab āñsuoñ ke rāstoñ pe mere dil kā ḳhuuñ chalā

nigāh-e-nāz se nigāh milne kī umiid thī

tamām umr chashm-e-tar meñ ḳhvāb gūnā-gūñ chalā

paroñ se us ke kaT ga.e bulandiyoñ ke āsmāñ

uḌaan bhar ke jab havāoñ par dil-e-zabūñ chalā

guzar ga.ī sadī ye fikr-e-tīr-e-chashm-e-nāz meñ

tamām jism chhoḌ kar ye sirf dil pe kyuuñ chalā

hazāroñ āñdhiyāñ simaT ke paañv se lipaT ga.iiñ

uThā to phir 'nadīm' ishq kī hadoñ se yuuñ chalā

gali mein ishq ki chala to husn ka fusun chala

fareb kha ke aadmi wahan se sar-nigun chala

raha wo sath jab talak mahak rahi thi rahguzar

hamare sath sath jaise lashkar-e-sukun chala

nibha saki na sath aashiqon ka kaenat bhi

qadam qadam mila ke sirf jazba-e-junun chala

taDap uThi hai tishnagi labon pe mere is qadar

na aae jam mujh talak ye daur mein na yun chala

mujhe hua yaqin apne ishq ke shabab par

jab aansuon ke raston pe mere dil ka KHun chala

nigah-e-naz se nigah milne ki umid thi

tamam umr chashm-e-tar mein KHwab guna-gun chala

paron se us ke kaT gae bulandiyon ke aasman

uDan bhar ke jab hawaon par dil-e-zabun chala

guzar gai sadi ye fikr-e-tir-e-chashm-e-naz mein

tamam jism chhoD kar ye sirf dil pe kyun chala

hazaron aandhiyan simaT ke panw se lipaT gain

uTha to phir 'nadim' ishq ki hadon se yun chala