galiyon mein meri ganw ka Dar bol raha hai

galiyoñ meñ mirī gaañv kā Dar bol rahā hai

lagtā hai siyāsat kā asar bol rahā hai

chhāle haiñ mire paañv meñ pur-ḳhār hai rasta

āsāñ nahīñ manzil ye safar bol rahā hai

tanhā.iyāñ rakhtī na kahīñ kā hameñ logo

bachchoñ ke chahakne se ye ghar bol rahā hai

sāzish ke sabab aag lagā.ī ga.ī har sū

bastī meñ ujāloñ kā safar bol rahā hai

aise bhī kiyā jaatā hai sachchā.ī ko zāhir

neze pe laTaktā huā sar bol rahā hai

kal tak jo riyā-kāroñ ke changul meñ phañsā thā

ab merī himāyat meñ nagar bol rahā hai

ho tāj-mahal yā ki ajantā kī guphā.eñ

fankār ke hāthoñ kā hunar bol rahā hai

dushman hai vo rāvan kī tarah vaar karegā

har samt fasādāt kā Dar bol rahā hai

ik tum hī nahīñ bolne vaale yahāñ 'sājid'

kahne do use vo bhī agar bol rahā hai

galiyon mein meri ganw ka Dar bol raha hai

lagta hai siyasat ka asar bol raha hai

chhaale hain mere panw mein pur-KHar hai rasta

aasan nahin manzil ye safar bol raha hai

tanhaiyan rakhti na kahin ka hamein logo

bachchon ke chahakne se ye ghar bol raha hai

sazish ke sabab aag lagai gai har su

basti mein ujalon ka safar bol raha hai

aise bhi kiya jata hai sachchai ko zahir

neze pe laTakta hua sar bol raha hai

kal tak jo riya-karon ke changul mein phansa tha

ab meri himayat mein nagar bol raha hai

ho taj-mahal ya ki ajanta ki guphaen

fankar ke hathon ka hunar bol raha hai

dushman hai wo rawan ki tarah war karega

har samt fasadat ka Dar bol raha hai

ek tum hi nahin bolne wale yahan 'sajid'

kahne do use wo bhi agar bol raha hai