gham dete hain sab koi bhi gham-KHwar nahin hai

ġham dete haiñ sab koī bhī ġham-ḳhvār nahīñ hai

ye shahr kisī kā bhī vafādār nahīñ hai

kyoñ ho ga.e maġhmūm hameñ dekh ke ahbāb

chehra hai hamārā koī aḳhbār nahīñ hai

miltā hai jo iḳhlās se sar apnā jhukā kar

aisā na samajhnā ki vo ḳhud.dār nahīñ hai

ye baat paḌosī ko ab achchhī nahīñ lagtī

āñgan meñ hamāre koī dīvār nahīñ hai

is tarah mujhe chashm-e-hiqārat se na dekho

hai kaun jo duniyā meñ gunahgār nahīñ hai

ab aur qayāmat kise kahte haiñ batāo

bhaa.ī ko bhī bhaa.ī se sarokār nahīñ hai

kah detā hai har baat kharī muñh pe hamesha

ā.īna kisī kā bhī taraf-dār nahīñ hai

har shaḳhs añdheroñ kī himāyat meñ hai masrūf

ab koī ujāloñ kā taraf-dār nahīñ hai

jhūToñ ke taraf-dār 'zamīr' aaj sabhī haiñ

sach kahne ko ab koī bhī tayyār nahīñ hai

gham dete hain sab koi bhi gham-KHwar nahin hai

ye shahr kisi ka bhi wafadar nahin hai

kyon ho gae maghmum hamein dekh ke ahbab

chehra hai hamara koi aKHbar nahin hai

milta hai jo iKHlas se sar apna jhuka kar

aisa na samajhna ki wo KHuddar nahin hai

ye baat paDosi ko ab achchhi nahin lagti

aangan mein hamare koi diwar nahin hai

is tarah mujhe chashm-e-hiqarat se na dekho

hai kaun jo duniya mein gunahgar nahin hai

ab aur qayamat kise kahte hain batao

bhai ko bhi bhai se sarokar nahin hai

kah deta hai har baat khari munh pe hamesha

aaina kisi ka bhi taraf-dar nahin hai

har shaKHs andheron ki himayat mein hai masruf

ab koi ujalon ka taraf-dar nahin hai

jhuTon ke taraf-dar 'zamir' aaj sabhi hain

sach kahne ko ab koi bhi tayyar nahin hai