gham-e-afaq mein aarif agar karwaT badalta hai

ġham-e-āfāq meñ aarif agar karvaT badaltā hai

siyāhī se qalam kī nuur kā mīnār Dhaltā hai

basīrat ho to har zarra tajallī-zār-e-sīnā hai

nigah tārīk ho to aa.ina zulmat ugaltā hai

huzūr-e-husn hotī hai kise dekheñ pazīrā.ī

sadā ibrat-asar dastūr-e-haq din-rāt chaltā hai

ḳhudā-āgāh kā har har nafas dars-e-tayaqqun hai

hayā-begāna taḳhrībī hamesha chaal chaltā hai

masāf-e-razm se hargiz na jā ā.īna-ḳhānoñ meñ

ḳhudā kā sher-dil āfāt ke qālib meñ Dhaltā hai

nigārish maqsad-e-taḳhlīq-e-barg-e-gul pe hai lekin

kise hai tāb-e-nazzāra charāġh-e-tūr jaltā hai

ḳhulūs-e-dil se bantā hai hisār-e-nār bhī jannat

ba-fazl-e-haq zamīn-e-shor se zamzam ubaltā hai

mazāq-e-sarfaroshī ḳhānqāhoñ se huā ruḳhsat

magar talvār kī mehrāb meñ sar-bāz paltā hai

zamāna mast-e-ishrat hai takalluf ke jahannam meñ

haram kā pāsbāñ but-ḳhāna-e-āzar meñ paltā hai

luTā dete haiñ almās-o-guhar sāhib-nazar hañs kar

sitāre Dūbte haiñ to koī sūraj nikaltā hai

baḌā daanā hai dīvāna kahīñ Thokar nahīñ khātā

añdherī raat hai lekin diyā to dil kā jaltā hai

sadāqat se lahak jaate haiñ tan-sāzoñ ke but-ḳhāne

ġhazal kī aag se faulād kā paikar pighaltā hai

tasarruf meñ shabistān-e-jahāñ hai ishq-o-mastī ke

zamāna so chukā hai faqr kā jaadū to chaltā hai

bahut dushvār hai chalnā sirāt-e-dīn-e-fitrat par

ḳhudā kī justujū meñ har nafas sho'la ugaltā hai

tumhārī azmat-e-dastār to taslīm hai nāseh

kaleja rāh-e-haq meñ sher mardoñ kā dahaltā hai

ye ḳhatra hai na le Duube parastish tan kī murshid ko

charāġh islām kā īsār-o-qurbānī se jaltā hai

dil-e-nāzuk pe harf aa.e na un 'bebāk' mastoñ ke

muqaddar jin kī Thokar se zamāne kā badaltā hai

gham-e-afaq mein aarif agar karwaT badalta hai

siyahi se qalam ki nur ka minar Dhalta hai

basirat ho to har zarra tajalli-zar-e-sina hai

nigah tarik ho to aaina zulmat ugalta hai

huzur-e-husn hoti hai kise dekhen pazirai

sada ibrat-asar dastur-e-haq din-raat chalta hai

KHuda-agah ka har har nafas dars-e-tayaqqun hai

haya-begana taKHribi hamesha chaal chalta hai

masaf-e-razm se hargiz na ja aaina-KHanon mein

KHuda ka sher-dil aafat ke qalib mein Dhalta hai

nigarish maqsad-e-taKHliq-e-barg-e-gul pe hai lekin

kise hai tab-e-nazzara charagh-e-tur jalta hai

KHulus-e-dil se banta hai hisar-e-nar bhi jannat

ba-fazl-e-haq zamin-e-shor se zamzam ubalta hai

mazaq-e-sarfaroshi KHanqahon se hua ruKHsat

magar talwar ki mehrab mein sar-baz palta hai

zamana mast-e-ishrat hai takalluf ke jahannam mein

haram ka pasban but-KHana-e-azar mein palta hai

luTa dete hain almas-o-guhar sahib-nazar hans kar

sitare Dubte hain to koi suraj nikalta hai

baDa dana hai diwana kahin Thokar nahin khata

andheri raat hai lekin diya to dil ka jalta hai

sadaqat se lahak jate hain tan-sazon ke but-KHane

ghazal ki aag se faulad ka paikar pighalta hai

tasarruf mein shabistan-e-jahan hai ishq-o-masti ke

zamana so chuka hai faqr ka jadu to chalta hai

bahut dushwar hai chalna siraat-e-din-e-fitrat par

KHuda ki justuju mein har nafas sho'la ugalta hai

tumhaari azmat-e-dastar to taslim hai naseh

kaleja rah-e-haq mein sher mardon ka dahalta hai

ye KHatra hai na le Dube parastish tan ki murshid ko

charagh islam ka isar-o-qurbani se jalta hai

dil-e-nazuk pe harf aae na un 'bebak' maston ke

muqaddar jin ki Thokar se zamane ka badalta hai