gham-e-duniya kisi ki yaad hasrat maut ki yaro

ġham-e-duniyā kisī kī yaad hasrat maut kī yaaro

inhīñ do-chār par hai ab madār-e-zindagī yaaro

ḳhushāmad jī-huzūrī maslahat-koshī ġharaz-mandī

yahī hai zindagī to phir hamārī bandagī yaaro

kisī kī chaah meñ jiite kisī kī chaah meñ marte

hamārā bhī koī hotā ye hasrat hī rahī yaaro

tumhāre saath rah kar bhī riyā-kārī nahīñ aa.ī

tumhārī kyā ḳhatā is meñ mirī bad-qismatī yaaro

vo jin kī dostī par aaj itrāte ho tum itnā

kabhī apnī bhī un logoñ se rasm-o-rāh thī yaaro

kahāñ tak tum fareb-e-dostī khāne se rokoge

sañbhal jā.egā ḳhud hī Thokareñ khā kar koī yaaro

na jiinā iḳhtiyārī hai na marnā iḳhtiyārī hai

ḳhudā jaane sazā hai zindagī kis jurm kī yaaro

tumhārī hī karam-farmā.iyoñ kā faiz hai varna

hameñ apne parā.e kī kahāñ pahchān thī yaaro

isī ko āgahī kahte haiñ is daur-e-siyāsat meñ

jahāñ tak ho sake hañste raho jhūTī hañsī yaaro

ye āh-o-zāriyāñ kaisī ye nauha-ḳhvāniyāñ kaisī

agar jiinā nahīñ aatā to kar lo ḳhud-kushī yaaro

ham itnā jānte haiñ 'āsī'-e-gustāḳh kī bābat

baḌā ḳhāmosh rahtā thā kabhī ye aadmī yaaro

gham-e-duniya kisi ki yaad hasrat maut ki yaro

inhin do-chaar par hai ab madar-e-zindagi yaro

KHushamad ji-huzuri maslahat-koshi gharaz-mandi

yahi hai zindagi to phir hamari bandagi yaro

kisi ki chah mein jite kisi ki chah mein marte

hamara bhi koi hota ye hasrat hi rahi yaro

tumhaare sath rah kar bhi riya-kari nahin aai

tumhaari kya KHata is mein meri bad-qismati yaro

wo jin ki dosti par aaj itraate ho tum itna

kabhi apni bhi un logon se rasm-o-rah thi yaro

kahan tak tum fareb-e-dosti khane se rokoge

sanbhal jaega KHud hi Thokaren kha kar koi yaro

na jina iKHtiyari hai na marna iKHtiyari hai

KHuda jaane saza hai zindagi kis jurm ki yaro

tumhaari hi karam-farmaiyon ka faiz hai warna

hamein apne parae ki kahan pahchan thi yaro

isi ko aagahi kahte hain is daur-e-siyasat mein

jahan tak ho sake hanste raho jhuTi hansi yaro

ye aah-o-zariyan kaisi ye nauha-KHwaniyan kaisi

agar jina nahin aata to kar lo KHud-kushi yaro

hum itna jaante hain 'asi'-e-gustaKH ki babat

baDa KHamosh rahta tha kabhi ye aadmi yaro