gham-e-firaq ko hum KHush-gawar karte rahe

ġham-e-firāq ko ham ḳhush-gavār karte rahe

tumhāre naam se zikr-e-bahār karte rahe

ḳhirad kā kaam bhī āshufta-kār karte rahe

ġham-e-habīb-o-ġham-e-rozgār karte rahe

kisī ne ḳhuun se apnā chaman sajā bhī liyā

bahut to shikva-e-lail-o-nahār karte rahe

tirā sulūk bhī ehsān hai magar ai dost

yahī sulūk mire ġham-gusār karte rahe

diloñ meñ yaad kī rāheñ bhī aaj suunī haiñ

kal intizār sar-e-rahguzār karte rahe

diloñ meñ rah ga.ī be-nām sī ḳhalish koī

tujhe bhī pā ke tirā intizār karte rahe

hayāt DhūñDne vaale ajal se kyā Darte

isī zamīn ko bāġh-o-bahār karte rahe

gunah meñ Dhaal diye zāhidoñ ke ḳhvāb-e-hasīñ

amal kā ruup hameñ zar-nigār karte rahe

hameñ jo yaad bhī aa.e haiñ vo lab-o-ruḳhsār

to pahroñ minnat-e-jām-o-bahār karte rahe

qarār-e-ishq hai 'saifī' vo jān-e-mahbūbī

qarār kho ke jise be-qarār karte rahe

gham-e-firaq ko hum KHush-gawar karte rahe

tumhaare nam se zikr-e-bahaar karte rahe

KHirad ka kaam bhi aashufta-kar karte rahe

gham-e-habib-o-gham-e-rozgar karte rahe

kisi ne KHun se apna chaman saja bhi liya

bahut to shikwa-e-lail-o-nahaar karte rahe

tera suluk bhi ehsan hai magar ai dost

yahi suluk mere gham-gusar karte rahe

dilon mein yaad ki rahen bhi aaj suni hain

kal intizar sar-e-rahguzar karte rahe

dilon mein rah gai be-nam si KHalish koi

tujhe bhi pa ke tera intizar karte rahe

hayat DhunDne wale ajal se kya Darte

isi zamin ko bagh-o-bahaar karte rahe

gunah mein Dhaal diye zahidon ke KHwab-e-hasin

amal ka rup hamein zar-nigar karte rahe

hamein jo yaad bhi aae hain wo lab-o-ruKHsar

to pahron minnat-e-jam-o-bahaar karte rahe

qarar-e-ishq hai 'saifi' wo jaan-e-mahbubi

qarar kho ke jise be-qarar karte rahe