gham-e-hayat charagh-e-sahar mein KHak nahin

ġham-e-hayāt charāġh-e-sahar meñ ḳhaak nahīñ

ki husn raat ke pichhle pahar meñ ḳhaak nahīñ

purāne 'ahd kī qadroñ kā marsiya likhiye

bashar ke taur mizāj-e-bashar meñ ḳhaak nahīñ

use zuhūr se parhez hai to shikva kyā

talab jamāl kī zauq-e-nazar meñ ḳhaak nahīñ

usī ke ‘āriz-e-tābāñ ke sab karishme haiñ

mire makān ke dīvār-o-dar meñ ḳhaak nahīñ

javāb ke liye pathrā ga.iiñ mirī āñkheñ

shu’ūr-e-nāma-barī nāma-bar meñ ḳhaak nahīñ

ye aur baat ki raas aa.ī ham ġharīboñ ko

ḳhulūs gardish-e-shām-o-sahar meñ ḳhaak nahīñ

navāz de mujhe manzil to ye mirī taqdīr

ki zād-e-rāh to ab ke safar meñ ḳhaak nahīñ

kamā ke rakkhe haiñ do chaar ulTe sīdhe nuqūsh

bas aur kuchh mire dast-e-hunar meñ ḳhaak nahīñ

jo kah sako to isī ko matā'-e-jāñ kah lo

shikasta dil ke sivā mere ghar meñ ḳhaak nahīñ

bulandiyoñ ke ta'āvun kā ḳhvāb kyoñ dekheñ

sakat uḌaan kī jab bāl-o-par meñ ḳhaak nahīñ

jo mujh pe utrā hai maiñ us kī sharh kartā huuñ

agarche fā.eda arz-e-hunar meñ ḳhaak nahīñ

chale kisī pe bhī ḳhanjar mujhe taḌapnā hai

ġhalat ki dard kī lazzat jigar meñ ḳhaak nahīñ

ġham-e-hayāt se āzād ho gayā hai 'ra.īs'

'ajīb baat ki hairat ḳhabar meñ ḳhaak nahīñ

gham-e-hayat charagh-e-sahar mein KHak nahin

ki husn raat ke pichhle pahar mein KHak nahin

purane 'ahd ki qadron ka marsiya likhiye

bashar ke taur mizaj-e-bashar mein KHak nahin

use zuhur se parhez hai to shikwa kya

talab jamal ki zauq-e-nazar mein KHak nahin

usi ke ‘ariz-e-taban ke sab karishme hain

mere makan ke diwar-o-dar mein KHak nahin

jawab ke liye pathra gain meri aankhen

shu’ur-e-nama-bari nama-bar mein KHak nahin

ye aur baat ki ras aai hum gharibon ko

KHulus gardish-e-sham-o-sahar mein KHak nahin

nawaz de mujhe manzil to ye meri taqdir

ki zad-e-rah to ab ke safar mein KHak nahin

kama ke rakkhe hain do chaar ulTe sidhe nuqush

bas aur kuchh mere dast-e-hunar mein KHak nahin

jo kah sako to isi ko mata'-e-jaan kah lo

shikasta dil ke siwa mere ghar mein KHak nahin

bulandiyon ke ta'awun ka KHwab kyon dekhen

sakat uDan ki jab baal-o-par mein KHak nahin

jo mujh pe utra hai main us ki sharh karta hun

agarche faeda arz-e-hunar mein KHak nahin

chale kisi pe bhi KHanjar mujhe taDapna hai

ghalat ki dard ki lazzat jigar mein KHak nahin

gham-e-hayat se aazad ho gaya hai 'rais'

'ajib baat ki hairat KHabar mein KHak nahin