gham-e-ishq mein nahin jo kisi nam tak na pahunche

ġham-e-ishq meñ nahīñ jo kisī naam tak na pahuñche

nahīñ yaad naam vo bhī jo salām tak na pahuñche

vo salām hī nahīñ hai jo payām tak na pahuñche

vo payām hī nahīñ hai jo kalām tak na pahuñche

vo kalām hī nahīñ hai jo tamām tak na pahuñche

vo tamām hī nahīñ hai jo davām tak na pahuñche

vo davām hī nahīñ hai jo mudām tak na pahuñche

vo mudām hī nahīñ jo tire naam tak na pahuñche

ye ḳhudā hī jaane vaa.iz ki huī namāz puurī

rahe mahv-e-sajda yuuñ ham ki salām tak na pahuñche

vahī dil hai jo na chāhe sar-e-bām husn aa.e

hai vahī nazar jo uTh kar lab-e-bām tak na pahuñche

tujhe sahl thā ye saaqī koī jaam ham tak aatā

hameñ kuchh to hogī mushkil tire jaam tak na pahuñche

vo tumhārī raah Thahrī na lage surāġh jis kā

ye hai rāsta hamārā jo maqām tak na pahuñche

tire naqsh-e-pā pe chalnā na huā kabhī mayassar

hamīñ apnī kaj-ravī se pa-e-gām tak na pahuñche

ye kamāl-e-be-ḳhudī hai ki natīja-e-ḳhudī hai

tujhe DhūñDte rahe yuuñ ki maqām tak na pahuñche

maiñ vo rind huuñ ki saaqī tirī baḳhshishoñ ke chhīñTe

mire zauq-o-shauq-e-durd-e-tah-e-jām tak na pahuñche

yahī āshiyāñ qafas hai hameñ is kī kyā ḳhushī hai

ki ham apnī be-parī se kabhī daam tak na pahuñche

mirā nāma-e-mohabbat na paḌhā unhoñ ne puurā

mujhe rah ga.ī ye hasrat mire naam tak na pahuñche

gham-e-ishq mein nahin jo kisi nam tak na pahunche

nahin yaad nam wo bhi jo salam tak na pahunche

wo salam hi nahin hai jo payam tak na pahunche

wo payam hi nahin hai jo kalam tak na pahunche

wo kalam hi nahin hai jo tamam tak na pahunche

wo tamam hi nahin hai jo dawam tak na pahunche

wo dawam hi nahin hai jo mudam tak na pahunche

wo mudam hi nahin jo tere nam tak na pahunche

ye KHuda hi jaane waiz ki hui namaz puri

rahe mahw-e-sajda yun hum ki salam tak na pahunche

wahi dil hai jo na chahe sar-e-baam husn aae

hai wahi nazar jo uTh kar lab-e-baam tak na pahunche

tujhe sahl tha ye saqi koi jam hum tak aata

hamein kuchh to hogi mushkil tere jam tak na pahunche

wo tumhaari rah Thahri na lage suragh jis ka

ye hai rasta hamara jo maqam tak na pahunche

tere naqsh-e-pa pe chalna na hua kabhi mayassar

hamin apni kaj-rawi se pa-e-gam tak na pahunche

ye kamal-e-be-KHudi hai ki natija-e-KHudi hai

tujhe DhunDte rahe yun ki maqam tak na pahunche

main wo rind hun ki saqi teri baKHshishon ke chhinTe

mere zauq-o-shauq-e-durd-e-tah-e-jam tak na pahunche

yahi aashiyan qafas hai hamein is ki kya KHushi hai

ki hum apni be-pari se kabhi dam tak na pahunche

mera nama-e-mohabbat na paDha unhon ne pura

mujhe rah gai ye hasrat mere nam tak na pahunche