gham-e-kaun-o-makan se fikr besh-o-kam se guzre hain

ġham-e-kaun-o-makāñ se fikr besh-o-kam se guzre haiñ

faqat ik jaam meñ ham kitne hī aalam se guzre haiñ

guzargāh-e-tamannā meñ gulistāñ ho ki zindāñ ho

jidhar guzre haiñ dīvāne isī dam-ḳham se guzre haiñ

zamāna āshnā hai sirf ashkoñ ke talātum se

vo tūfāñ aur haiñ jo dīda-e-be-nam se guzre haiñ

guzarnā ḳhāk-e-dil se shāyad un ko baar guzrā hai

nishān-e-pā batāte haiñ ki kuchh barham se guzre haiñ

hameñ ai gardish-e-daurāñ gayā-guzrā na jaan itnā

guzarne par jab aa.e haiñ to har aalam se guzre haiñ

kise kahte haiñ vaqtoñ kī nazākat aap kyā jāneñ

hamī vāqif haiñ ham kis kis maqām-e-ġham se guzre haiñ

bahāroñ kī tamannā meñ luTī thī zindagī jin kī

bahār aa.ī to raqs-e-sho.ala-o-shabnam se guzre haiñ

nazar ko raushnī kyā 'shauq' deñge Dūbte taare

ka.ī sūraj hamāre sāmne maddham se guzre haiñ

gham-e-kaun-o-makan se fikr besh-o-kam se guzre hain

faqat ek jam mein hum kitne hi aalam se guzre hain

guzargah-e-tamanna mein gulistan ho ki zindan ho

jidhar guzre hain diwane isi dam-KHam se guzre hain

zamana aashna hai sirf ashkon ke talatum se

wo tufan aur hain jo dida-e-be-nam se guzre hain

guzarna KHak-e-dil se shayad un ko bar guzra hai

nishan-e-pa batate hain ki kuchh barham se guzre hain

hamein ai gardish-e-dauran gaya-guzra na jaan itna

guzarne par jab aae hain to har aalam se guzre hain

kise kahte hain waqton ki nazakat aap kya jaanen

hami waqif hain hum kis kis maqam-e-gham se guzre hain

bahaaron ki tamanna mein luTi thi zindagi jin ki

bahaar aai to raqs-e-shoala-o-shabnam se guzre hain

nazar ko raushni kya 'shauq' denge Dubte tare

kai suraj hamare samne maddham se guzre hain