gham-e-ulfat hai sabab KHalq mein ruswai ka

ġham-e-ulfat hai sabab ḳhalq meñ rusvā.ī kā

naam badnām huā kyoñ shab-e-tanhā.ī kā

TukḌe TukḌe hai jigar aap ke saudā.ī kā

sāmnā aaj bhī hai hashr meñ rusvā.ī kā

maut aatī hai na imkāñ hai shakebā.ī kā

aag lag jaa.e burā ho shab-e-tanhā.ī kā

dil ke TukḌe na karo husn kī zīnat hai yahī

aa.ina TuuTā to kyā lutf ḳhud-ārā.ī kā

paḌ ga.ī ahl-e-qayāmat kī garebāñ pe nazar

chhiḌ gayā hashr meñ qissa mirī rusvā.ī kā

phir kashish ne dar-e-mahbūb kī khīñchā dil ko

phir huā zauq hameñ nāsiya-farsā.ī kā

ghaTtī jaatī hai charāġh-e-dil-e-sozāñ kī ziyā

baḌhtā jaatā hai añdherā shab-e-tanhā.ī kā

kyoñ na insān ho mushtāq-e-tilism-e-duniyā

dil bahaltā hai tamāshe se tamāshā.ī kā

chhā ga.ī zulmat-e-ġham dil pe ḳhudā ḳhair kare

aa gayā chāñd gahan meñ shab-e-tanhā.ī kā

hālat-e-naza.a hai dam toḌ rahā hai bīmār

nā-tavānī meñ ye 'ālam hai tavānā.ī kā

kar chuke aap hamārā dil-e-murda zinda

saath 'iisā ke gayā daur masīhā.ī kā

aañkh meñ maut kī phir jaatī hai sūrat ab tak

ba-ḳhudā naam burā hai shab-e-tanhā.ī kā

ḳhair itnā to huā mashq-e-jafā se hāsil

aa gayā tum ko salīqa sitam-ārā.ī kā

aaj hai kal se ġhanīmat ye sunā jaatā hai

dūr-az-hāl mizāj aap ke saudā.ī kā

le gayā husn-e-ḳhudā-dād butoñ kā 'mas.ūd'

maqdarat sabr kī imkān shakebā.ī kā

gham-e-ulfat hai sabab KHalq mein ruswai ka

nam badnam hua kyon shab-e-tanhai ka

TukDe TukDe hai jigar aap ke saudai ka

samna aaj bhi hai hashr mein ruswai ka

maut aati hai na imkan hai shakebai ka

aag lag jae bura ho shab-e-tanhai ka

dil ke TukDe na karo husn ki zinat hai yahi

aaina TuTa to kya lutf KHud-arai ka

paD gai ahl-e-qayamat ki gareban pe nazar

chhiD gaya hashr mein qissa meri ruswai ka

phir kashish ne dar-e-mahbub ki khincha dil ko

phir hua zauq hamein nasiya-farsai ka

ghaTti jati hai charagh-e-dil-e-sozan ki ziya

baDhta jata hai andhera shab-e-tanhai ka

kyon na insan ho mushtaq-e-tilism-e-duniya

dil bahalta hai tamashe se tamashai ka

chha gai zulmat-e-gham dil pe KHuda KHair kare

aa gaya chand gahan mein shab-e-tanhai ka

haalat-e-naza hai dam toD raha hai bimar

na-tawani mein ye 'alam hai tawanai ka

kar chuke aap hamara dil-e-murda zinda

sath 'isa ke gaya daur masihai ka

aankh mein maut ki phir jati hai surat ab tak

ba-KHuda nam bura hai shab-e-tanhai ka

KHair itna to hua mashq-e-jafa se hasil

aa gaya tum ko saliqa sitam-arai ka

aaj hai kal se ghanimat ye suna jata hai

dur-az-haal mizaj aap ke saudai ka

le gaya husn-e-KHuda-dad buton ka 'masud'

maqdarat sabr ki imkan shakebai ka