gham hai khane ko ashk pine ko

ġham hai khāne ko ashk piine ko

ye bhī kam kyā hai apne jiine ko

dil meñ hargiz na rakhiye kiine ko

aur bhī ġham bahut haiñ jiine ko

apne dil meñ chhupā.e phirtā huuñ

maiñ tire dard ke dafīne ko

jis ko kahtī hai ashk-e-ġham duniyā

koī dekhe to is nagīne ko

mauj-dar-mauj aa rahī hai sadā

Duub jaane do ab safīne ko

laag meñ hai lagāo kā andāz

kaun samjhegā is qarīne ko

sochtā huuñ ki kis se duuñ tashbīh

is jabīñ par hasīñ pasīne ko

ishq ne kar diyā hai mujh ko nihāl

dekhiye dard ke ḳhazīne ko

shikva bar-haq 'nazīr' ye socho

Thes pahuñchegī ābgīne ko

gham hai khane ko ashk pine ko

ye bhi kam kya hai apne jine ko

dil mein hargiz na rakhiye kine ko

aur bhi gham bahut hain jine ko

apne dil mein chhupae phirta hun

main tere dard ke dafine ko

jis ko kahti hai ashk-e-gham duniya

koi dekhe to is nagine ko

mauj-dar-mauj aa rahi hai sada

Dub jaane do ab safine ko

lag mein hai lagao ka andaz

kaun samjhega is qarine ko

sochta hun ki kis se dun tashbih

is jabin par hasin pasine ko

ishq ne kar diya hai mujh ko nihaal

dekhiye dard ke KHazine ko

shikwa bar-haq 'nazir' ye socho

Thes pahunchegi aabgine ko