gham kahin samt-e-safar thi rahbar koi na tha

ġham kahīñ samt-e-safar thī rāhbar koī na thā

ek sahrā-e-alam thā ham-safar koī na thā

us ko bhī ham ne yahī samjhā tamāshā hai koī

jab khulīñ āñkheñ nishān-e-sañg-e-dar koī na thā

vaqt ham ko Thokaroñ par Thokareñ detā rahā

aur apne haath meñ tīr-o-tabar koī na thā

qarya-e-bedād-ḳhvāhāñ kī shikāyat hai abas

shahr-e-ham-dardāñ meñ bhī to chārāgar koī na thā

dhajjiyāñ uḌtī rahīñ jaib-o-garebāñ kī mire

rok detā bazm meñ āshufta-sar koī na thā

mere rāzoñ meñ na koī raaz baaqī rah gayā

ham-nashīnoñ meñ mire nā-mo'tabar koī na thā

is liye ham nargis-e-bīmār ke qaa.il hue

us ke jaisā bhī chaman meñ dīda-var koī na thā

dil ke zaḳhmoñ ko atā karnā thā lafzoñ kā libās

aur 'az.har' maqsad-e-arz-e-hunar koī na thā

gham kahin samt-e-safar thi rahbar koi na tha

ek sahra-e-alam tha ham-safar koi na tha

us ko bhi hum ne yahi samjha tamasha hai koi

jab khulin aankhen nishan-e-sang-e-dar koi na tha

waqt hum ko Thokaron par Thokaren deta raha

aur apne hath mein tir-o-tabar koi na tha

qarya-e-bedad-KHwahan ki shikayat hai abas

shahr-e-ham-dardan mein bhi to chaaragar koi na tha

dhajjiyan uDti rahin jaib-o-gareban ki mere

rok deta bazm mein aashufta-sar koi na tha

mere raazon mein na koi raaz baqi rah gaya

ham-nashinon mein mere na-mo'tabar koi na tha

is liye hum nargis-e-bimar ke qail hue

us ke jaisa bhi chaman mein dida-war koi na tha

dil ke zaKHmon ko ata karna tha lafzon ka libas

aur 'azhar' maqsad-e-arz-e-hunar koi na tha