gham ke baadal phir bhi chhae rah gae

ġham ke bādal phir bhī chhā.e rah ga.e

aañkh se dariyā ke dariyā bah ga.e

ḳhauf-e-uqbā aur is duniyā ke ba.ad

vo bhī sah leñge jo ye ġham sah ga.e

kis ne dekhā hai jamāl-e-rū-e-dost

sab naqāboñ meñ ulajh kar rah ga.e

muḳhtasar thī dāstān-e-arz-e-shauq

bujh ke kuchh taare mizha par rah ga.e

ziist hai ik shaam afsāne kā naam

apnī apnī dāstāñ sab kah ga.e

tab kahīñ jā kar milī sat.h-e-sukūñ

Duub kar jab ġham meñ tah-dar-tah ga.e

vaar kar ke ziist bhāgī aur ham

āstīñ apnī chaḌhāte rah ga.e

chand shaitāñ band kar ke ḳhush haiñ yuuñ

jaise bāhar sab farishte rah ga.e

ashk ban paa.e na ġham ke tarjumāñ

ye numā.ish hī meñ apnī rah ga.e

zindagī se laḌ na paayā josh-e-dil

par bahut tole magar rah rah ga.e

ashk the jab tak farozāñ ġham na thā

ab añdhere meñ akele rah ga.e

jebeñ sab yāroñ ne bhar liiñ bazm meñ

ek 'mullā' the jo yūñhī rah ga.e

gham ke baadal phir bhi chhae rah gae

aankh se dariya ke dariya bah gae

KHauf-e-uqba aur is duniya ke baad

wo bhi sah lenge jo ye gham sah gae

kis ne dekha hai jamal-e-ru-e-dost

sab naqabon mein ulajh kar rah gae

muKHtasar thi dastan-e-arz-e-shauq

bujh ke kuchh tare mizha par rah gae

zist hai ek sham afsane ka nam

apni apni dastan sab kah gae

tab kahin ja kar mili sath-e-sukun

Dub kar jab gham mein tah-dar-tah gae

war kar ke zist bhagi aur hum

aastin apni chaDhate rah gae

chand shaitan band kar ke KHush hain yun

jaise bahar sab farishte rah gae

ashk ban pae na gham ke tarjuman

ye numaish hi mein apni rah gae

zindagi se laD na paya josh-e-dil

par bahut tole magar rah rah gae

ashk the jab tak farozan gham na tha

ab andhere mein akele rah gae

jeben sab yaron ne bhar lin bazm mein

ek 'mulla' the jo yunhi rah gae