gham ke tufan dil-e-muztar mein Thahar jate hain

ġham ke tūfāñ dil-e-muztar meñ Thahar jaate haiñ

aish ke lamhe to pal bhar meñ guzar jaate haiñ

haif-sad-haif ki nā-qadri-e-fan ke hāthoñ

kitne fankār lahū thuuk ke mar jaate haiñ

vo pahuñch sakte nahīñ bām-e-taraqqī pe kabhī

vaqt ke ziine se jo log utar jaate haiñ

ahl-e-dānish pe uThātā nahīñ uñglī koī

jitne ilzām haiñ dīvānoñ ke sar jaate haiñ

azm-o-himmat ko banā lete haiñ jo rāh-numā

saḳht rāhoñ se bhī hañs hañs ke guzar jaate haiñ

apne ehsās ke jalte hue vīrāne meñ

ḳhushk pattoñ kī tarah log bikhar jaate haiñ

jab shab-e-ġham meñ mujhe terā ḳhayāl aatā hai

merī tanhā.ī ke lamhāt sañvar jaate haiñ

tohfa-e-mahr-o-vafā kaun yahāñ detā hai

dil kā kashkol liye aap kidhar jaate haiñ

kis tarah vaqt kī Thokar vo kareñge bardāsht

dil dhaḌakne kī sadā sun ke jo Dar jaate haiñ

un ke saa.e se bhī tum duur raho ai 'ma.asūm'

apne va.ade se jo ahbāb mukar jaate haiñ

gham ke tufan dil-e-muztar mein Thahar jate hain

aish ke lamhe to pal bhar mein guzar jate hain

haif-sad-haif ki na-qadri-e-fan ke hathon

kitne fankar lahu thuk ke mar jate hain

wo pahunch sakte nahin baam-e-taraqqi pe kabhi

waqt ke zine se jo log utar jate hain

ahl-e-danish pe uThata nahin ungli koi

jitne ilzam hain diwanon ke sar jate hain

azm-o-himmat ko bana lete hain jo rah-numa

saKHt rahon se bhi hans hans ke guzar jate hain

apne ehsas ke jalte hue virane mein

KHushk patton ki tarah log bikhar jate hain

jab shab-e-gham mein mujhe tera KHayal aata hai

meri tanhai ke lamhat sanwar jate hain

tohfa-e-mahr-o-wafa kaun yahan deta hai

dil ka kashkol liye aap kidhar jate hain

kis tarah waqt ki Thokar wo karenge bardasht

dil dhaDakne ki sada sun ke jo Dar jate hain

un ke sae se bhi tum dur raho ai 'masum'

apne wade se jo ahbab mukar jate hain