gham ki diwar ko main zer-o-zabar kar na saka

ġham kī dīvār ko maiñ zer-o-zabar kar na sakā

ik yahī ma.arka aisā thā jo sar kar na sakā

dil vo āzād parinda hai ki jis ko maiñ ne

qaid karnā to bahut chāhā magar kar na sakā

duur itnī bhī na thī manzil-e-maqsūd magar

yuuñ paḌe paañv meñ chhāle ki safar kar na sakā

zindagī merī kaTī ek sazā ke mānind

chain se duniyā meñ pal-bhar bhī basar kar na sakā

āsmāñ par vo gayā qalb-e-zamīñ meñ utrā

kaun sā kaam hai aisā jo bashar kar na sakā

baat jaisī bhī ho tāsīr hai shart-e-lāzim

sher vo kyā jo kisī dil meñ bhī ghar kar na sakā

gham ki diwar ko main zer-o-zabar kar na saka

ek yahi marka aisa tha jo sar kar na saka

dil wo aazad parinda hai ki jis ko main ne

qaid karna to bahut chaha magar kar na saka

dur itni bhi na thi manzil-e-maqsud magar

yun paDe panw mein chhaale ki safar kar na saka

zindagi meri kaTi ek saza ke manind

chain se duniya mein pal-bhar bhi basar kar na saka

aasman par wo gaya qalb-e-zamin mein utra

kaun sa kaam hai aisa jo bashar kar na saka

baat jaisi bhi ho tasir hai shart-e-lazim

sher wo kya jo kisi dil mein bhi ghar kar na saka