gham ki tahzib aziyyat ka qarina sikhen

ġham kī tahzīb aziyyat kā qarīna sīkheñ

aao is shahr meñ jiinā hai to jiinā sīkheñ

maut aane kī sadā lamha-ba-lamha chāheñ

ziist karne kā hunar zīna-ba-zīna sīkheñ

har nahīñ haañ se baḌī hai ye haqīqat samjheñ

haañ bahut siikh chuke ab to koī nā sīkheñ

jhāñk kar āñkhoñ meñ siine meñ utar kar dekheñ

naqsha-e-dil se koī rāz-e-dafīna sīkheñ

shahr-e-kotāh meñ sab past-nashīñ past-nishāñ

kis ko hamrāz kareñ kis kā qarīna sīkheñ

falsafa ishq kā asrār fan-o-hikmat ke

ḳhānqāhoñ se paḌheñ sīna-ba-sīna sīkheñ

dil to ā.īna hai shaffāf rakheñ ai 'shāhid'

kyuuñ kareñ buġhz-o-hasad kis liye kiina sīkheñ

gham ki tahzib aziyyat ka qarina sikhen

aao is shahr mein jina hai to jina sikhen

maut aane ki sada lamha-ba-lamha chahen

zist karne ka hunar zina-ba-zina sikhen

har nahin han se baDi hai ye haqiqat samjhen

han bahut sikh chuke ab to koi na sikhen

jhank kar aankhon mein sine mein utar kar dekhen

naqsha-e-dil se koi raaz-e-dafina sikhen

shahr-e-kotah mein sab past-nashin past-nishan

kis ko hamraaz karen kis ka qarina sikhen

falsafa ishq ka asrar fan-o-hikmat ke

KHanqahon se paDhen sina-ba-sina sikhen

dil to aaina hai shaffaf rakhen ai 'shahid'

kyun karen bughz-o-hasad kis liye kina sikhen