gham le ke masarrat ka saman humne banaya

ġham le ke masarrat kā samāñ ham ne banāyā

ashkoñ se sitāroñ kā jahāñ ham ne banāyā

be-qadr banā rakkhā thā aġhyār ne jis ko

is baar amānat ko girāñ ham ne banāyā

nazroñ meñ to but-ḳhāne kā but-ḳhāna thā lekin

dil de ke tumheñ rashk-e-butāñ ham ne banāyā

ḳhud to na rahe anjuman-e-nāz ke qābil

haañ tere liye dil kā makāñ ham ne banāyā

lo aag lagā baiThe hamāre hī jigar meñ

mahfil meñ jinheñ sho.ala-bayāñ ham ne banāyā

guftār kā maidān tumhārā sahī lekin

alfāz ko shāyān-e-zabāñ ham ne banāyā

ādāb na.e ham ne diye rāh-ravī ko

Thokar ko bhī ik sang-e-nishāñ ham ne banāyā

be-kaifī-e-mahfil meñ bhī ye shoḳhī-e-mastī

dil TuuTā to ik ratl-e-girāñ ham ne banāyā

hoñToñ pe lagī muhr to nairañg-e-nazar se

ik ma.arka-e-lafz-o-bayāñ ham ne banāyā

us ne hī bharā zahr se paimāna hamārā

'jauhar' vo jise pīr-e-muġhāñ ham ne banāyā

gham le ke masarrat ka saman hum ne banaya

ashkon se sitaron ka jahan hum ne banaya

be-qadr bana rakkha tha aghyar ne jis ko

is bar amanat ko giran hum ne banaya

nazron mein to but-KHane ka but-KHana tha lekin

dil de ke tumhein rashk-e-butan hum ne banaya

KHud to na rahe anjuman-e-naz ke qabil

han tere liye dil ka makan hum ne banaya

lo aag laga baiThe hamare hi jigar mein

mahfil mein jinhen shoala-bayan hum ne banaya

guftar ka maidan tumhaara sahi lekin

alfaz ko shayan-e-zaban hum ne banaya

aadab nae hum ne diye rah-rawi ko

Thokar ko bhi ek sang-e-nishan hum ne banaya

be-kaifi-e-mahfil mein bhi ye shoKHi-e-masti

dil TuTa to ek ratl-e-giran hum ne banaya

honTon pe lagi muhr to nairang-e-nazar se

ek marka-e-lafz-o-bayan hum ne banaya

us ne hi bhara zahr se paimana hamara

'jauhar' wo jise pir-e-mughan hum ne banaya