gham mujhse kisi taur sameTa nahin jata

ġham mujh se kisī taur sameTā nahīñ jaatā

pahrā hai mirī soch pe bolā nahīñ jaatā

ab dil ke dhaḌakne kī sadā bhī nahīñ aatī

aur qarya-e-ḳhvāhish se bhī niklā nahīñ jaatā

sajde ke nishānoñ se jabīñ zaḳhm huī hai

aur tujh se muqaddar mirā badlā nahīñ jaatā

sūraj ke nikalne kī ḳhabar mujh ko bhī karnā

zulmat-kada-e-shab meñ to Thahrā nahīñ jaatā

āñkhoñ meñ chhupe ḳhvāb bhī chhin jaa.eñ na mujh se

is ḳhauf se rauzan koī kholā nahīñ jaatā

har roz nasheman pe mire girtī hai bijlī

ghar mujh se nayā roz banāyā nahīñ jaatā

ham apnī anāoñ kā bharam rakhte haiñ 'shahnāz'

har baat pe tūfān uThāyā nahīñ jaatā

gham mujh se kisi taur sameTa nahin jata

pahra hai meri soch pe bola nahin jata

ab dil ke dhaDakne ki sada bhi nahin aati

aur qarya-e-KHwahish se bhi nikla nahin jata

sajde ke nishanon se jabin zaKHm hui hai

aur tujh se muqaddar mera badla nahin jata

suraj ke nikalne ki KHabar mujh ko bhi karna

zulmat-kada-e-shab mein to Thahra nahin jata

aankhon mein chhupe KHwab bhi chhin jaen na mujh se

is KHauf se rauzan koi khola nahin jata

har roz nasheman pe mere girti hai bijli

ghar mujh se naya roz banaya nahin jata

hum apni anaon ka bharam rakhte hain 'shahnaz'

har baat pe tufan uThaya nahin jata