gham na do itna ki meri jaan nikal jae kahin

ġham na do itnā ki merī jaañ nikal jaa.e kahīñ

āñsuoñ se jism kī miTTī na gal jaa.e kahīñ

pak rahā ho jaise laavā jism kī chaTTān meñ

terā dāman merī aahoñ se na jal jaa.e kahīñ

dil meñ us kī parvarish karnā agar be-sūd hai

ashk ban kar ḳhvāb āñkhoñ se nikal jaa.e kahīñ

raat ke āsār haiñ phir ik zarā vaqfe ke ba.ad

merā sūraj bhī numū pā kar na Dhal jaa.e kahīñ

terī ye sohbat hai aisī jis pe sadiyāñ vaar duuñ

chhoḌ kar mujh ko na ye ma.asūm pal jaa.e kahīñ

vo mire ehsās meñ lipTā hai mausam kī tarah

ab mirī shāḳh-e-dil-o-jāñ meñ na phal jaa.e kahīñ

kah diyā 'maqsūd' ko apnī faqīrī hai aziiz

ho nahīñ saktā ye banda sar ke bal jaa.e kahīñ

gham na do itna ki meri jaan nikal jae kahin

aansuon se jism ki miTTi na gal jae kahin

pak raha ho jaise lawa jism ki chaTTan mein

tera daman meri aahon se na jal jae kahin

dil mein us ki parwarish karna agar be-sud hai

ashk ban kar KHwab aankhon se nikal jae kahin

raat ke aasar hain phir ek zara waqfe ke baad

mera suraj bhi numu pa kar na Dhal jae kahin

teri ye sohbat hai aisi jis pe sadiyan war dun

chhoD kar mujh ko na ye masum pal jae kahin

wo mere ehsas mein lipTa hai mausam ki tarah

ab meri shaKH-e-dil-o-jaan mein na phal jae kahin

kah diya 'maqsud' ko apni faqiri hai aziz

ho nahin sakta ye banda sar ke bal jae kahin