gham par hain tana-zan to KHushi bhi nibhaiye

ġham par haiñ ta.ana-zan to ḳhushī bhī nibhā.iye

sarkār merī bāda-kashī bhī nibhā.iye

motī se ashk aap ke qadmoñ ko the aziiz

sūkhe hue laboñ kī hañsī bhī nibhā.iye

pahle to mauj-e-gul thī mire har ḳhayāl meñ

ab fikr kī ye sho.ala-ravī bhī nibhā.iye

ye kyā ki aap sirf parastish kareñ qubūl

ma.abūd-e-shahr merī ḳhudī bhī nibhā.iye

be-shak huzūr sāqī-e-bazm-e-bahār haiñ

lekin ḳhud apnī tishna-labī bhī nibhā.iye

haañ in hasīn ā.ankhoñ meñ raqsāñ hai zindagī

palkoñ kī ho sake to namī bhī nibhā.iye

shahzād-gān-e-mumlikat-e-husn ke tufail

ham shā.iroñ kī kaj-kulahī bhī nibhā.iye

gham par hain tana-zan to KHushi bhi nibhaiye

sarkar meri baada-kashi bhi nibhaiye

moti se ashk aap ke qadmon ko the aziz

sukhe hue labon ki hansi bhi nibhaiye

pahle to mauj-e-gul thi mere har KHayal mein

ab fikr ki ye shoala-rawi bhi nibhaiye

ye kya ki aap sirf parastish karen qubul

mabud-e-shahr meri KHudi bhi nibhaiye

be-shak huzur saqi-e-bazm-e-bahaar hain

lekin KHud apni tishna-labi bhi nibhaiye

han in hasin aaankhon mein raqsan hai zindagi

palkon ki ho sake to nami bhi nibhaiye

shahzad-gan-e-mumlikat-e-husn ke tufail

hum shairon ki kaj-kulahi bhi nibhaiye