gham raha baqi na gham ka imtihan baqi raha

ġham rahā baaqī na ġham kā imtihāñ baaqī rahā

mere ġham se ishq kā nām-o-nishāñ baaqī rahā

fasl-e-gul kā is se baḌh kar aur kyā hogā sulūk

bijliyoñ kī chhāvnī meñ āshiyāñ baaqī rahā

jab kisī sūrat vo merā dard-e-dil sunte nahīñ

phir kahāñ lutf-e-zabāñ lutf-e-bayāñ baaqī rahā

āḳhirī dam tak mohabbat meñ hazāroñ ġham sahe

mujh pe lutf-e-zīst kā phir bhī gumāñ baaqī rahā

tinkā tinkā gulsitāñ kā ho gayā sarf-e-ḳhizāñ

bijliyoñ kī nazr ko ik āshiyāñ baaqī rahā

phuul bante hī kalī kā rāz-e-hastī khul gayā

chaar din bhī husn kā parda kahāñ baaqī rahā

rafta rafta uTh ga.e saare hijābāt-e-nazar

parda-e-nāz un ke mere darmiyāñ baaqī rahā

kitnī dard-angez hai ai dost tārīḳh-e-bahār

luT gayā saarā chaman ik āshiyāñ baaqī rahā

dard-o-ġham kī chāñdnī meñ rahm-dil hañsne lage

ashk-bārī meñ jo aalam thā kahāñ baaqī rahā

rahnumā haiñ vo na vo jaada na vo raftār hai

kārvāñ kaisā fareb-e-kārvāñ baaqī rahā

baat ye 'sājid' zamāne bhar meñ hai maanī huī

mere hī sajdoñ se un kā āstāñ baaqī rahā

gham raha baqi na gham ka imtihan baqi raha

mere gham se ishq ka nam-o-nishan baqi raha

fasl-e-gul ka is se baDh kar aur kya hoga suluk

bijliyon ki chhawni mein aashiyan baqi raha

jab kisi surat wo mera dard-e-dil sunte nahin

phir kahan lutf-e-zaban lutf-e-bayan baqi raha

aaKHiri dam tak mohabbat mein hazaron gham sahe

mujh pe lutf-e-zist ka phir bhi guman baqi raha

tinka tinka gulsitan ka ho gaya sarf-e-KHizan

bijliyon ki nazr ko ek aashiyan baqi raha

phul bante hi kali ka raaz-e-hasti khul gaya

chaar din bhi husn ka parda kahan baqi raha

rafta rafta uTh gae sare hijabaat-e-nazar

parda-e-naz un ke mere darmiyan baqi raha

kitni dard-angez hai ai dost tariKH-e-bahaar

luT gaya sara chaman ek aashiyan baqi raha

dard-o-gham ki chandni mein rahm-dil hansne lage

ashk-bari mein jo aalam tha kahan baqi raha

rahnuma hain wo na wo jada na wo raftar hai

karwan kaisa fareb-e-karwan baqi raha

baat ye 'sajid' zamane bhar mein hai mani hui

mere hi sajdon se un ka aastan baqi raha