gham se bhige hue naghmat kahan se laun

ġham se bhīge hue naġhmāt kahāñ se lā.ūñ

dard meñ Duubī huī baat kahāñ se lā.ūñ

jin meñ yādoñ ko tirī jhoñk duuñ jalne ke liye

vo sulagte hue din raat kahāñ se lā.ūñ

jo pasand aa.e tujhe ḳhūn-e-jigar ke badle

sone chāñdī kī vo sauġhāt kahāñ se lā.ūñ

dil bhī tishna hai mirī ruuh bhī tishna hai magar

tere jalvoñ kī vo barsāt kahāñ se lā.ūñ

tere vaade jo tujhe yaad dilā.eñ zālim

haa.e maazī ke vo lamhāt kahāñ se lā.ūñ

jab mire bhaag meñ tanhā.ī kā añdhiyārā hai

phir bhalā prem kī parbhāt kahāñ se lā.ūñ

dil mirā rotā hai tanhā.ī meñ pahroñ 'shevan'

vo buzurgoñ kī hidāyāt kahāñ se lā.ūñ

gham se bhige hue naghmat kahan se laun

dard mein Dubi hui baat kahan se laun

jin mein yaadon ko teri jhonk dun jalne ke liye

wo sulagte hue din raat kahan se laun

jo pasand aae tujhe KHun-e-jigar ke badle

sone chandi ki wo saughat kahan se laun

dil bhi tishna hai meri ruh bhi tishna hai magar

tere jalwon ki wo barsat kahan se laun

tere wade jo tujhe yaad dilaen zalim

hae mazi ke wo lamhat kahan se laun

jab mere bhag mein tanhai ka andhiyara hai

phir bhala prem ki parbhat kahan se laun

dil mera rota hai tanhai mein pahron 'shewan'

wo buzurgon ki hidayat kahan se laun