gham se jab aagahi nahin hoti

ġham se jab āgahī nahīñ hotī

ḳhush bhī rah kar ḳhushī nahīñ hotī

jab tavajjoh tirī nahīñ hotī

zindagī zindagī nahīñ hotī

uf vo māyūsī-e-hayāt ki jab

hasrat-e-marg bhī nahīñ hotī

hañsne vaalo tumheñ shu'ūr bhī hai

har ḳhushī to ḳhushī nahīñ hotī

baḌhtī jaatī hai dil kī māyūsī

aarzū meñ kamī nahīñ hotī

ab to taskīn-e-dil basā auqāt

terī mahfil meñ bhī nahīñ hotī

jo jabīñ tere dar pe jhuk na sake

qābil-e-bandagī nahīñ hotī

maiñ ne dekhā hai chāñd tāroñ meñ

shām-e-ġham raushnī nahīñ hotī

shiddat-e-ġham kā raaz khultā hai

mere lab par hañsī nahīñ hotī

kyā sitam hai ki 'aql vāloñ ko

'ishq se āgahī nahīñ hotī

kyā junūñ hai ki log kahte haiñ

'aql dīvāngī nahīñ hotī

ye junūn-e-payambarī 'maḳhmūr'

is tarah shā'irī nahīñ hotī

gham se jab aagahi nahin hoti

KHush bhi rah kar KHushi nahin hoti

jab tawajjoh teri nahin hoti

zindagi zindagi nahin hoti

uf wo mayusi-e-hayat ki jab

hasrat-e-marg bhi nahin hoti

hansne walo tumhein shu'ur bhi hai

har KHushi to KHushi nahin hoti

baDhti jati hai dil ki mayusi

aarzu mein kami nahin hoti

ab to taskin-e-dil basa auqat

teri mahfil mein bhi nahin hoti

jo jabin tere dar pe jhuk na sake

qabil-e-bandagi nahin hoti

main ne dekha hai chand taron mein

sham-e-gham raushni nahin hoti

shiddat-e-gham ka raaz khulta hai

mere lab par hansi nahin hoti

kya sitam hai ki 'aql walon ko

'ishq se aagahi nahin hoti

kya junun hai ki log kahte hain

'aql diwangi nahin hoti

ye junun-e-payambari 'maKHmur'

is tarah sha'iri nahin hoti