gham tera mujhe jaan se guzarne nahin deta

ġham terā mujhe jaañ se guzarne nahīñ detā

marnā bhī agar chāhūñ to marne nahīñ detā

ik buuñd bhī pāyāb nazar aatī hai ab to

ye Dar mujhe dariyā meñ utarne nahīñ detā

hālāt pe mauqūf nahīñ apnī tabāhī

qismat kā likhā bhī to sañvarne nahīñ detā

phūloñ se vo har sub.h uḌā letā hai surḳhī

be-rañg kalī ko bhī nikharne nahīñ detā

marham jise samjhā thā zamāne kī nazar ne

bharte hue zaḳhmoñ ko bhī bharne nahīñ detā

har raah ko vo saañp kī mānind hai ghere

vo rāhguzar se bhī guzarne nahīñ detā

'imrran' maiñ ik umr se patthar kī tarah huuñ

ḳhushbū kī tarah mujh ko bikharne nahīñ detā

gham tera mujhe jaan se guzarne nahin deta

marna bhi agar chahun to marne nahin deta

ek bund bhi payab nazar aati hai ab to

ye Dar mujhe dariya mein utarne nahin deta

haalat pe mauquf nahin apni tabahi

qismat ka likha bhi to sanwarne nahin deta

phulon se wo har subh uDa leta hai surKHi

be-rang kali ko bhi nikharne nahin deta

marham jise samjha tha zamane ki nazar ne

bharte hue zaKHmon ko bhi bharne nahin deta

har rah ko wo sanp ki manind hai ghere

wo rahguzar se bhi guzarne nahin deta

'imrran' main ek umr se patthar ki tarah hun

KHushbu ki tarah mujh ko bikharne nahin deta