ghamon ke shahr mein iqrar-e-zindagi kyon hai

ġhamoñ ke shahr meñ iqrār-e-zindagī kyoñ hai

diloñ ke paas abhī tak ye raushnī kyoñ hai

nikal ke ghar se mirī soch pāgaloñ kī tarah

siyāh-rāt ke jangal meñ ghūmtī kyoñ hai

bayān-e-dard ke uslūb aur bhī hoñge

har ek baat ba-unvān-e-shā.erī kyoñ hai

bhaTak rahā huuñ bagūloñ ke saath sahrā meñ

mire nasīb meñ sadiyoñ kī tishnagī kyoñ hai

har ek daur ne mā’tūb jis ko Thahrāyā

mirī zabān pe vo harf-e-āgahī kyoñ hai

phir aaj vaqt kī pur-shor āñdhiyoñ kī tarah

kisī ke naam kā charchā galī galī kyoñ hai

milī to koī taqāza na kar sakī mujh se

tumhārī yaad bhī itnī thakī huī kyoñ hai

nā jaane kaun saḳhī is taraf se guzregā

fasīl-e-shab se pare bhiiḌ sī lagī kyoñ hai

miTī miTī sī lakīreñ haiñ jis taraf dekho

ġham-e-hayāt kī tasvīr ek sī kyoñ hai

kisī badan kī pur-asrār chāñdnī ab bhī

mire qarīb hī bistar pe leTtī kyoñ hai

kisī ko aaj nahīñ kal batā.ūñgā 'jāmī'

qalam kī aag meñ ḳhvāboñ kī dil-kashī kyoñ hai

ghamon ke shahr mein iqrar-e-zindagi kyon hai

dilon ke pas abhi tak ye raushni kyon hai

nikal ke ghar se meri soch pagalon ki tarah

siyah-raat ke jangal mein ghumti kyon hai

bayan-e-dard ke uslub aur bhi honge

har ek baat ba-unwan-e-shaeri kyon hai

bhaTak raha hun bagulon ke sath sahra mein

mere nasib mein sadiyon ki tishnagi kyon hai

har ek daur ne ma’tub jis ko Thahraya

meri zaban pe wo harf-e-agahi kyon hai

phir aaj waqt ki pur-shor aandhiyon ki tarah

kisi ke nam ka charcha gali gali kyon hai

mili to koi taqaza na kar saki mujh se

tumhaari yaad bhi itni thaki hui kyon hai

na jaane kaun saKHi is taraf se guzrega

fasil-e-shab se pare bhiD si lagi kyon hai

miTi miTi si lakiren hain jis taraf dekho

gham-e-hayat ki taswir ek si kyon hai

kisi badan ki pur-asrar chandni ab bhi

mere qarib hi bistar pe leTti kyon hai

kisi ko aaj nahin kal bataunga 'jami'

qalam ki aag mein KHwabon ki dil-kashi kyon hai