ghamon ki hukmrani ho gai hai

ġhamoñ kī hukmrānī ho ga.ī hai

ḳhudā kī mehrbānī ho ga.ī hai

lagā do marqad-e-'ġhālib' pe katba

ġhazal kaafī purānī ho ga.ī hai

tumhārī yaad kā shāyad guzar ho

fazā kuchh zāfrānī ho ga.ī hai

purāne maqbaroñ kī zard miTTī

buzurgoñ kī nishānī ho ga.ī hai

lagā.eñ kab talak paivand sāñseñ

ye chādar ab purānī ho ga.ī hai

vo hoñToñ par ḳhamoshī sī chukā hai

use kuchh bad-gumānī ho ga.ī hai

ye āñgan kitne hissoñ meñ bañTegā

rivāyat ḳhāndānī ho ga.ī hai

mirī āñkhoñ ke manzar bujh chuke haiñ

mirī beTī siyānī ho ga.ī hai

hañsī bhī ab mire hoñToñ kī 'tāriq'

balā-e-nā-gahānī ho ga.ī hai

ghamon ki hukmrani ho gai hai

KHuda ki mehrbani ho gai hai

laga do marqad-e-'ghaalib' pe katba

ghazal kafi purani ho gai hai

tumhaari yaad ka shayad guzar ho

faza kuchh zafrani ho gai hai

purane maqbaron ki zard miTTi

buzurgon ki nishani ho gai hai

lagaen kab talak paiwand sansen

ye chadar ab purani ho gai hai

wo honTon par KHamoshi si chuka hai

use kuchh bad-gumani ho gai hai

ye aangan kitne hisson mein banTega

riwayat KHandani ho gai hai

meri aankhon ke manzar bujh chuke hain

meri beTi siyani ho gai hai

hansi bhi ab mere honTon ki 'tariq'

bala-e-na-gahani ho gai hai