ghamon ko apne daba ke rakhna kamal hai ya nahin hai bolo

ġhamoñ ko apne dabā ke rakhnā kamāl hai yā nahīñ hai bolo

ye dil kī daulat chhupā ke rakhnā kamāl hai yā nahīñ hai bolo

har ik tamanna kī rahguzar par muḳhālifat kī havā ke sar par

charāġh-e-ulfat jalā ke rakhnā kamāl hai yā nahīñ hai bolo

samundaroñ kā mizāj ho kar zamīn-e-chāhat pe ashk bo kar

laboñ pe ḳhushkī sajā ke rakhnā kamāl hai yā nahīñ hai bolo

rafāqatoñ ke usuul jaise mahakte ḳhush-rang phuul jaise

jigar ko patthar banā ke rakhnā kamāl hai yā nahīñ hai bolo

vo guzre lamhe vo saal saare diye jo rūmāl tum ne saare

vo apne dil meñ sajā ke rakhnā kamāl hai yā nahīñ hai bolo

vo raushnī kā surāġh ban kar khulī chhatoñ kā charāġh ban kar

ḳhilāf ḳhud ko havā ke rakhnā kamāl hai yā nahīñ hai bolo

na.e zamāna ke qāsidoñ se hai bachnā kis tarah hāsidoñ se

'shikhā' ko sab kuchh sikhā ke rakhnā kamāl hai yā nahīñ hai bolo

ghamon ko apne daba ke rakhna kamal hai ya nahin hai bolo

ye dil ki daulat chhupa ke rakhna kamal hai ya nahin hai bolo

har ek tamanna ki rahguzar par muKHalifat ki hawa ke sar par

charagh-e-ulfat jala ke rakhna kamal hai ya nahin hai bolo

samundaron ka mizaj ho kar zamin-e-chahat pe ashk bo kar

labon pe KHushki saja ke rakhna kamal hai ya nahin hai bolo

rafaqaton ke usul jaise mahakte KHush-rang phul jaise

jigar ko patthar bana ke rakhna kamal hai ya nahin hai bolo

wo guzre lamhe wo sal sare diye jo rumal tum ne sare

wo apne dil mein saja ke rakhna kamal hai ya nahin hai bolo

wo raushni ka suragh ban kar khuli chhaton ka charagh ban kar

KHilaf KHud ko hawa ke rakhna kamal hai ya nahin hai bolo

nae zamana ke qasidon se hai bachna kis tarah hasidon se

'shikha' ko sab kuchh sikha ke rakhna kamal hai ya nahin hai bolo