ghamon mein bhi masarrat ki farawani nahin jati

ġhamoñ meñ bhī masarrat kī farāvānī nahīñ jaatī

hamāre zaḳhm-e-dil kī ḳhanda-sāmānī nahīñ jaatī

na jaane kaun se aalam meñ le aaya junūñ mujh ko

ki manzil sāmne hai aur pahchānī nahīñ jaatī

ba-zāhir to chaman meñ har taraf jashn-e-bahārāñ hai

na jaane kyoñ guloñ kī chāk-dāmānī nahīñ jaatī

hamārī ḳhairiyat vo pūchhte rahte haiñ ġhairoñ se

ḳhalish dard-e-mohabbat kī ba-āsānī nahīñ jaatī

mah-o-ḳhurshīd-o-anjum par kamandeñ Dālne vaalo

sabab kyā hai ki zehnoñ kī pareshānī nahīñ jaatī

abhī tak ḳhud-ġharaz hāthoñ meñ hai nazm-e-chaman shāyad

bahār aa.ī magar gulshan kī vīrānī nahīñ jaatī

hamārī kashtī-e-ummīd ke vo nāḳhudā Thahre

abhī tak nabz-e-tūfāñ jin se pahchānī nahīñ jaatī

guzar jaatā hai ik saaya sā dil kī rah-guzāroñ se

ġham-e-māzī kī ab tak fitna-sāmānī nahīñ jaatī

'tarab' shāyad vahī manzil hai sarhad husn-e-jānāñ kī

jahāñ se aur aage aql-e-insānī nahīñ jaatī

ghamon mein bhi masarrat ki farawani nahin jati

hamare zaKHm-e-dil ki KHanda-samani nahin jati

na jaane kaun se aalam mein le aaya junun mujh ko

ki manzil samne hai aur pahchani nahin jati

ba-zahir to chaman mein har taraf jashn-e-bahaaran hai

na jaane kyon gulon ki chaak-damani nahin jati

hamari KHairiyat wo puchhte rahte hain ghairon se

KHalish dard-e-mohabbat ki ba-asani nahin jati

mah-o-KHurshid-o-anjum par kamanden Dalne walo

sabab kya hai ki zehnon ki pareshani nahin jati

abhi tak KHud-gharaz hathon mein hai nazm-e-chaman shayad

bahaar aai magar gulshan ki virani nahin jati

hamari kashti-e-ummid ke wo naKHuda Thahre

abhi tak nabz-e-tufan jin se pahchani nahin jati

guzar jata hai ek saya sa dil ki rah-guzaron se

gham-e-mazi ki ab tak fitna-samani nahin jati

'tarab' shayad wahi manzil hai sarhad husn-e-jaanan ki

jahan se aur aage aql-e-insani nahin jati