gar apne aap mein insan baDhta ja raha hai

gar apne aap meñ insān baḌhtā jā rahā hai

to phir kyuuñ is qadar bohrān baḌhtā jā rahā hai

simaTtā jā rahā hai dā.era mālik makāñ kā

makāñ par qabza-e-mehmān baḌhtā jā rahā hai

mujhe lagtā hai sahrā kī taraf jaanā paḌegā

dar-o-dīvār kā ehsān baḌhtā jā rahā hai

bahut din ho ga.e royā na apne haal pe shahr

diloñ meñ ḳhitta-e-vīrān baḌhtā jā rahā hai

bahut sā husn pahlī baar dekhā hai kisī ne

tū us kī hī taraf hairān baḌhtā jā rahā hai

badan ḳhālī karo aur kashtī-e-jāñ ko bachāo

ḳhatarnākī kā ye sāmān baḌhtā jā rahā hai

numū karnā sunā hai jān-dāroñ kī sifat hai

magar ye shahr to be-jān baḌhtā jā rahā hai

na jaane kitne bhūkoñ kī kifālat ho rahī hai

havas-kārī kā dastar-ḳhvān baḌhtā jā rahā hai

miyāñ 'ehsās-jī' kuchh shā.irī bhī karte rahiye

ye maanā aap kā dīvān baḌhtā jā rahā hai

gar apne aap mein insan baDhta ja raha hai

to phir kyun is qadar bohran baDhta ja raha hai

simaTta ja raha hai daera malik makan ka

makan par qabza-e-mehman baDhta ja raha hai

mujhe lagta hai sahra ki taraf jaana paDega

dar-o-diwar ka ehsan baDhta ja raha hai

bahut din ho gae roya na apne haal pe shahr

dilon mein KHitta-e-viran baDhta ja raha hai

bahut sa husn pahli bar dekha hai kisi ne

tu us ki hi taraf hairan baDhta ja raha hai

badan KHali karo aur kashti-e-jaan ko bachao

KHatarnaki ka ye saman baDhta ja raha hai

numu karna suna hai jaan-daron ki sifat hai

magar ye shahr to be-jaan baDhta ja raha hai

na jaane kitne bhukon ki kifalat ho rahi hai

hawas-kari ka dastar-KHwan baDhta ja raha hai

miyan 'ehsas-ji' kuchh shairi bhi karte rahiye

ye mana aap ka diwan baDhta ja raha hai