gar aur bhi meri turbat pe yar Thahrega

gar aur bhī mirī turbat pe yaar Thahregā

to zer-e-ḳhāk na ye be-qarār Thahregā

na bolo koī mire jhagḌe meñ samajh lūñgā

mire aur us ke jo dār-o-madār Thahregā

agar ye hai tire dāman kī hashr-o-nashr miyāñ

zamīñ pe ḳhaak hamārā ġhubār Thahregā

chalī bhī jā jaras-e-ġhuncha kī sadā pe nasīm

kahīñ to qāfila-e-nau-bahār Thahregā

tumhāre nāvak-e-mizhgāñ ke sāmne ḳhūbāñ

kahāñ talak ye dil-e-dāġhdār Thahregā

yahī hai luuT to shāne ke haath se pyāre

na ek bhī tirī zulfoñ kā taar Thahregā

tumhāre va.adoñ pe ham ko to ab nahīñ Thahrāv

magar nayā koī ummīd-vār Thahregā

jo sair karnī hai kar le ki jab ḳhizāñ aa.ī

na gul rahegā chaman meñ na ḳhaar Thahregā

ḳhadañg-ḳhurda dil aage se us ke jaatā hai

ḳhabar nahīñ ki kahāñ ye shikār Thahregā

shitāb aa.iyo Thahrā rakheñge ham us ko

jo jaañ laboñ pe shab-e-intizār Thahregā

use na dafn karo samjho to koī yaaro

zamīñ meñ 'mus.hafī'-e-be-qarār Thahregā

gar aur bhi meri turbat pe yar Thahrega

to zer-e-KHak na ye be-qarar Thahrega

na bolo koi mere jhagDe mein samajh lunga

mere aur us ke jo dar-o-madar Thahrega

agar ye hai tere daman ki hashr-o-nashr miyan

zamin pe KHak hamara ghubar Thahrega

chali bhi ja jaras-e-ghuncha ki sada pe nasim

kahin to qafila-e-nau-bahaar Thahrega

tumhaare nawak-e-mizhgan ke samne KHuban

kahan talak ye dil-e-daghdar Thahrega

yahi hai luT to shane ke hath se pyare

na ek bhi teri zulfon ka tar Thahrega

tumhaare wadon pe hum ko to ab nahin Thahraw

magar naya koi ummid-war Thahrega

jo sair karni hai kar le ki jab KHizan aai

na gul rahega chaman mein na KHar Thahrega

KHadang-KHurda dil aage se us ke jata hai

KHabar nahin ki kahan ye shikar Thahrega

shitab aaiyo Thahra rakhenge hum us ko

jo jaan labon pe shab-e-intizar Thahrega

use na dafn karo samjho to koi yaro

zamin mein 'mushafi'-e-be-qarar Thahrega