gar mohabbat ho to aisa nahin karte jaanan

gar mohabbat ho to aisā nahīñ karte jānāñ

biich raste meñ to chhoḌā nahīñ karte jānāñ

tum kisī ḳhvāb kī sūrat ho mirī āñkhoñ meñ

ḳhvāb āñkhoñ ko to nochā nahīñ karte jānāñ

jaañ se pyāroñ pe bahut maan huā kartā hai

yuuñ kisī maan ko toḌā nahīñ karte jānāñ

yaad rakhne ke jo qābil hoñ unhī logoñ ko

is qadar jald to bhūlā nahīñ karte jānāñ

'ishq meñ jhukne se tauqīr nahīñ ghaTtī hai

ḳhud-parastī ko labāda nahīñ karte jānāñ

rāh-e-pur-ḳhār pe hotā hai kaThin chalnā magar

saath denā ho to sochā nahīñ karte jānāñ

zarf vaale haiñ isī vāste chup haiñ itne

ġham ko sahte haiñ tamāshā nahīñ karte jānāñ

tum jo kahte ho ki jī pāoge mere bin bhī

ḳhud pe itnā bhī bharosā nahīñ karte jānāñ

sāmne vaalā hī har baar manā.egā hameñ

aisī ummīd pe rūThā nahīñ karte jānāñ

gar mohabbat ho to aisa nahin karte jaanan

bich raste mein to chhoDa nahin karte jaanan

tum kisi KHwab ki surat ho meri aankhon mein

KHwab aankhon ko to nocha nahin karte jaanan

jaan se pyaron pe bahut man hua karta hai

yun kisi man ko toDa nahin karte jaanan

yaad rakhne ke jo qabil hon unhi logon ko

is qadar jald to bhula nahin karte jaanan

'ishq mein jhukne se tauqir nahin ghaTti hai

KHud-parasti ko labaada nahin karte jaanan

rah-e-pur-KHar pe hota hai kaThin chalna magar

sath dena ho to socha nahin karte jaanan

zarf wale hain isi waste chup hain itne

gham ko sahte hain tamasha nahin karte jaanan

tum jo kahte ho ki ji paoge mere bin bhi

KHud pe itna bhi bharosa nahin karte jaanan

samne wala hi har bar manaega hamein

aisi ummid pe ruTha nahin karte jaanan