gar mujhse KHafa ho to saza kyon nahin dete

gar mujh se ḳhafā ho to sazā kyoñ nahīñ dete

mujh ko bharī mahfil se uThā kyoñ nahīñ dete

hotā hai faqat jin se añdheroñ meñ izāfa

tum aise charāġhoñ ko bujhā kyoñ nahīñ dete

bīmār tumhāre lab-e-dam haiñ zarā dekho

tum kaise masīhā ho davā kyoñ nahīñ dete

vo jins-e-girāñ jis ko vafā kahtī hai duniyā

bāzār meñ biktī hai to lā kyoñ nahīñ dete

rahte ho rag-e-jāñ se bhī nazdīk ye maanā

tum DhūñDne vāloñ ko patā kyoñ nahīñ dete

mahfil meñ jo hāl-e-dil-e-pur-dard tumhārā

vo pūchh rahā hai to batā kyoñ nahīñ dete

'hāmid' tumheñ manzil kā patā jis ne batāyā

tum aise musāfir ko duā kyoñ nahīñ dete

gar mujh se KHafa ho to saza kyon nahin dete

mujh ko bhari mahfil se uTha kyon nahin dete

hota hai faqat jin se andheron mein izafa

tum aise charaghon ko bujha kyon nahin dete

bimar tumhaare lab-e-dam hain zara dekho

tum kaise masiha ho dawa kyon nahin dete

wo jins-e-giran jis ko wafa kahti hai duniya

bazar mein bikti hai to la kyon nahin dete

rahte ho rag-e-jaan se bhi nazdik ye mana

tum DhunDne walon ko pata kyon nahin dete

mahfil mein jo haal-e-dil-e-pur-dard tumhaara

wo puchh raha hai to bata kyon nahin dete

'hamid' tumhein manzil ka pata jis ne bataya

tum aise musafir ko dua kyon nahin dete