gar shor hai dil mein bhara to KHamushi achchhi nahin

gar shor hai dil meñ bharā to ḳhāmushī achchhī nahīñ

jo ġhair hāthoñ meñ phañsī vo zindagī achchhī nahīñ

ik baar kī hī haar hai is ko na dil se tū lagā

yuuñ zindagī se haar kar phir ḳhud-kushī achchhī nahīñ

jo dost bin saj jaa.e vo mahfil nahīñ mahfil koī

ya.anī akele jashn kī koī ḳhushī achchhī nahīñ

gar jism kī hī chaah hai us ko mohabbat kyoñ kaheñ

noche havas meñ jo badan vo tishnagī achchhī nahīñ

mahbūb kī āñkheñ agar kartī nahīñ mad.hosh to

phir chhoḌ do ye mai-kashī ye mai-kashī achchhī nahīñ

jo haath thāmā hai mirā to bā-vafā rahnā sadā

jo bevafā ho jaao to phir tum sakhī achchhī nahīñ

kaise ḳhushī is ko kahūñ jo chashm terī nam kare

auroñ ke ġham kā ho sabab vo sarḳhushī achchhī nahīñ

sāhab jo kuchh bhī tum karo to faḳhr ke qābil karo

duniyā ke aage baap kī nazreñ jhukī achchhī nahīñ

gar shor hai dil mein bhara to KHamushi achchhi nahin

jo ghair hathon mein phansi wo zindagi achchhi nahin

ek bar ki hi haar hai is ko na dil se tu laga

yun zindagi se haar kar phir KHud-kushi achchhi nahin

jo dost bin saj jae wo mahfil nahin mahfil koi

yani akele jashn ki koi KHushi achchhi nahin

gar jism ki hi chah hai us ko mohabbat kyon kahen

noche hawas mein jo badan wo tishnagi achchhi nahin

mahbub ki aankhen agar karti nahin madhosh to

phir chhoD do ye mai-kashi ye mai-kashi achchhi nahin

jo hath thama hai mera to ba-wafa rahna sada

jo bewafa ho jao to phir tum sakhi achchhi nahin

kaise KHushi is ko kahun jo chashm teri nam kare

auron ke gham ka ho sabab wo sarKHushi achchhi nahin

sahab jo kuchh bhi tum karo to faKHr ke qabil karo

duniya ke aage bap ki nazren jhuki achchhi nahin