gar taqaddus chahte ho apne dastarKHwan ka

gar taqaddus chāhte ho apne dastarḳhvān kā

mat ta.āruf pochhiye aa.e hue mehmān kā

aa gayā thā gardish-e-shām-o-sahar meñ bhī sukūt

āsmānoñ par thā ye pahlā safar insān kā

muflisī ne chhīn lī thī mere chehre kī shanāḳht

varna saare shahr meñ har shaḳhs thā pahchān kā

ab bhī apne jurm kā tum log kar lo e'tirāf

ye havā.eñ pesh-ḳhema haiñ kisī tūfān kā

dekhne ke vāste husn-e-basīrat chāhiye

zarra-zarra aaj bhī sonā hai hindostān kā

gar taqaddus chahte ho apne dastarKHwan ka

mat taaruf pochhiye aae hue mehman ka

aa gaya tha gardish-e-sham-o-sahar mein bhi sukut

aasmanon par tha ye pahla safar insan ka

muflisi ne chhin li thi mere chehre ki shanaKHt

warna sare shahr mein har shaKHs tha pahchan ka

ab bhi apne jurm ka tum log kar lo e'tiraf

ye hawaen pesh-KHema hain kisi tufan ka

dekhne ke waste husn-e-basirat chahiye

zarra-zarra aaj bhi sona hai hindostan ka