gar tu mere ru-ba-ru shamil nahin

gar tū mere rū-ba-rū shāmil nahīñ

is safar kī mujh meñ ḳhū shāmil nahīñ

aaj tak māñgī nahīñ aisī duā

jis meñ terī aarzū shāmil nahīñ

aisī duniyā kā nahīñ koī javāz

aisī duniyā jis meñ tū shāmil nahīñ

maiñ karūñ kyā aise dil kā jis meñ dost

tū yā terī justujū shāmil nahīñ

yaad use kar saktā huuñ maiñ har jagah

is ibādat meñ vuzū shāmil nahīñ

aisī mahfil meñ bhalā jā.egā kaun

jis meñ terī guftugū shāmil nahīñ

kitnā be-ma.anī hai merā dikhnā gar

dekhne vāloñ meñ tū shāmil nahīñ

hijr hai tapte hue sahrā kā naam

jis meñ koī āb-jū shāmil nahīñ

dostoñ ne muḳhbirī kī thī mirī

is kahānī meñ adū shāmil nahīñ

gar tu mere ru-ba-ru shamil nahin

is safar ki mujh mein KHu shamil nahin

aaj tak mangi nahin aisi dua

jis mein teri aarzu shamil nahin

aisi duniya ka nahin koi jawaz

aisi duniya jis mein tu shamil nahin

main karun kya aise dil ka jis mein dost

tu ya teri justuju shamil nahin

yaad use kar sakta hun main har jagah

is ibaadat mein wuzu shamil nahin

aisi mahfil mein bhala jaega kaun

jis mein teri guftugu shamil nahin

kitna be-mani hai mera dikhna gar

dekhne walon mein tu shamil nahin

hijr hai tapte hue sahra ka nam

jis mein koi aab-ju shamil nahin

doston ne muKHbiri ki thi meri

is kahani mein adu shamil nahin