garan hai zoaf jab hum ko hansi mein wo uDate hain

garāñ hai zo.af jab ham ko hañsī meñ vo uḌāte haiñ

to misl-e-gard uTh kar ḳhaak par ham baiTh jaate haiñ

kaf-e-afsos kā malnā hai apnī sho.abada-bāzī

jigar kī aag ko hāthoñ se mal mal kar bujhāte haiñ

sikhā.ī un ko ḳhallāqī payām-e-vasl ne mere

na.ī sūrat kā vo har dam nayā hiila banāte haiñ

ḳhudā kī shaan hai ranjish bhī apnī un ko zīnat hai

ki jab vo dekhte haiñ ham ko apnā muñh banāte haiñ

nahīñ uThtī kisī kī baat ye nāzuk mizājī hai

ta.ajjub hai vo har dam kis tarah fitna uThāte haiñ

ġhizā chhuTne kā merī jab kisī se zikr sunte haiñ

to kahte haiñ ki vo dhoke mire hāthoñ se khāte haiñ

nikālā hai unhoñ ne kis maze kā zikr ai 'sābir'

adū ko gāliyāñ dete haiñ aur mujh ko sunāte haiñ

garan hai zoaf jab hum ko hansi mein wo uDate hain

to misl-e-gard uTh kar KHak par hum baiTh jate hain

kaf-e-afsos ka malna hai apni shoabada-bazi

jigar ki aag ko hathon se mal mal kar bujhate hain

sikhai un ko KHallaqi payam-e-wasl ne mere

nai surat ka wo har dam naya hila banate hain

KHuda ki shan hai ranjish bhi apni un ko zinat hai

ki jab wo dekhte hain hum ko apna munh banate hain

nahin uThti kisi ki baat ye nazuk mizaji hai

tajjub hai wo har dam kis tarah fitna uThate hain

ghiza chhuTne ka meri jab kisi se zikr sunte hain

to kahte hain ki wo dhoke mere hathon se khate hain

nikala hai unhon ne kis maze ka zikr ai 'sabir'

adu ko galiyan dete hain aur mujh ko sunate hain