gharaz nahin mujhe is se ki kya diya tu ne

ġharaz nahīñ mujhe is se ki kyā diyā tū ne

hazār-shukr ki jo kuchh diyā diyā tū ne

ḳhayāl-e-ḳhidmat-e-ḳhalq-e-ḳhudā diyā tū ne

mujhe hayāt kā maqsad batā diyā tū ne

bashar ye kuchh na kiyā shar baḌhā diyā tū ne

judā jo dair se ka.aba banā diyā tū ne

doī kā dil se jo parda uThā diyā tū ne

haram kā dair kā jhagḌā miTā diyā tū ne

najāt paa.ī thī mar mar ke qaid-e-hastī se

ki phir hayāt kā naqsha jamā diyā tū ne

kabhī thiiñ āñkheñ to aaya nazar na tū mujh ko

huiiñ jo band to jalva dikhā diyā tū ne

nahīñ havas mujhe duniyā kī jāh-o-hashmat kī

bahut diyā dil-e-dard-āshnā diyā tū ne

jahāñ meñ aane se pahle thā vāqif-e-asrār

jahāñ meñ aate hī sab kuchh bhulā diyā tū ne

jinheñ yaqīn hai duniyā kī be-sabātī kā

unheñ azāb-e-girāñ se bachā diyā tū ne

kahāñ thā hosh mujhe pī ke bāda-e-hastī

ajal bā-hosh kahā aur jagā diyā tū ne

jo dil ke jaan ḳharīdār thā gosha-e-turbat

use bhī gardish-e-daurāñ miTā diyā tū ne

mire sivā tere jalvoñ ko koī kyā jaane

tahayyurāt kā aalam dikhā diyā tū ne

vafūr-e-nūr se vahdat ke bazm-e-kasrat meñ

har ek zarra meñ jalva dikhā diyā tū ne

vo farq apne parā.e meñ kuchh nahīñ karte

diloñ se jin ke man-o-tū miTā diyā tū ne

bahār-e-be-ḳhudī mamnūn hai tirā 'sūfī'

sukūn-e-qalb kā aalam dikhā diyā tū ne

gharaz nahin mujhe is se ki kya diya tu ne

hazar-shukr ki jo kuchh diya diya tu ne

KHayal-e-KHidmat-e-KHalq-e-KHuda diya tu ne

mujhe hayat ka maqsad bata diya tu ne

bashar ye kuchh na kiya shar baDha diya tu ne

juda jo dair se kaba bana diya tu ne

doi ka dil se jo parda uTha diya tu ne

haram ka dair ka jhagDa miTa diya tu ne

najat pai thi mar mar ke qaid-e-hasti se

ki phir hayat ka naqsha jama diya tu ne

kabhi thin aankhen to aaya nazar na tu mujh ko

huin jo band to jalwa dikha diya tu ne

nahin hawas mujhe duniya ki jah-o-hashmat ki

bahut diya dil-e-dard-ashna diya tu ne

jahan mein aane se pahle tha waqif-e-asrar

jahan mein aate hi sab kuchh bhula diya tu ne

jinhen yaqin hai duniya ki be-sabaati ka

unhen azab-e-giran se bacha diya tu ne

kahan tha hosh mujhe pi ke baada-e-hasti

ajal ba-hosh kaha aur jaga diya tu ne

jo dil ke jaan KHaridar tha gosha-e-turbat

use bhi gardish-e-dauran miTa diya tu ne

mere siwa tere jalwon ko koi kya jaane

tahayyuraat ka aalam dikha diya tu ne

wafur-e-nur se wahdat ke bazm-e-kasrat mein

har ek zarra mein jalwa dikha diya tu ne

wo farq apne parae mein kuchh nahin karte

dilon se jin ke man-o-tu miTa diya tu ne

bahaar-e-be-KHudi mamnun hai tera 'sufi'

sukun-e-qalb ka aalam dikha diya tu ne