gharaz rahbar se kya mujhko gila hai jazb-e-kaamil se

ġharaz rahbar se kyā mujh ko gila hai jazb-e-kāmil se

ki jitnā baḌh rahā huuñ haT rahā huuñ duur manzil se

sukūt-e-be-mahal taqrīr-e-be-mauqa.a kī tohmat kyuuñ

uThānā ho to yuuñ ham ko uThā do apnī mahfil se

ye armān-e-taraqqī aaj hai da.avā ḳhudā.ī kā

usī dil kā jo kal tak thā lahū kī buuñd mushkil se

gul-o-lāla pe āḳhir kar rahā hai ġhaur kyā gulchīñ

ye vo ḳhuuñ hai jo Tapkā thā kabhī chashm-e-anādil se

shab-e-mahtāb dariyā kā kināra aur ye sannāTā

tumheñ is saaz par ham ḳhush kareñge naġhma-e-dil se

ġhazab hai jal ke parvānoñ kā un kī bazm meñ kahnā

'ravāñ' yā yuuñ fidā ho jaao yā uTh jaao mahfil se

gharaz rahbar se kya mujh ko gila hai jazb-e-kaamil se

ki jitna baDh raha hun haT raha hun dur manzil se

sukut-e-be-mahal taqrir-e-be-mauqa ki tohmat kyun

uThana ho to yun hum ko uTha do apni mahfil se

ye arman-e-taraqqi aaj hai dawa KHudai ka

usi dil ka jo kal tak tha lahu ki bund mushkil se

gul-o-lala pe aaKHir kar raha hai ghaur kya gulchin

ye wo KHun hai jo Tapka tha kabhi chashm-e-anadil se

shab-e-mahtab dariya ka kinara aur ye sannaTa

tumhein is saz par hum KHush karenge naghma-e-dil se

ghazab hai jal ke parwanon ka un ki bazm mein kahna

'rawan' ya yun fida ho jao ya uTh jao mahfil se