gard-o-ghubar yun baDha chehra bikhar gaya

gard-o-ġhubār yuuñ baḌhā chehra bikhar gayā

malbūs thā maiñ jis meñ labāda bikhar gayā

kal raat jugnuoñ kī samundar pe bhiiḌ thī

lagtā thā raushnī kā jazīra bikhar gayā

dahshat thī is qadar ki manāzir pighal ga.e

gir kar badan se ḳhud mirā saaya bikhar gayā

manzar meñ aur nazar meñ tasādum thā raat bhar

jab bhī uThī nigāheñ darīcha bikhar gayā

jaañ se ziyāda rakkhā jise ehtiyāt se

virse meñ jo milā thā vo tohfa bikhar gayā

tūfān-e-yād-e-raftagāñ itnā shadīd thā

ashkoñ se merī aañkh kā taarā bikhar gayā

gard-o-ghubar yun baDha chehra bikhar gaya

malbus tha main jis mein labaada bikhar gaya

kal raat jugnuon ki samundar pe bhiD thi

lagta tha raushni ka jazira bikhar gaya

dahshat thi is qadar ki manazir pighal gae

gir kar badan se KHud mera saya bikhar gaya

manzar mein aur nazar mein tasadum tha raat bhar

jab bhi uThi nigahen daricha bikhar gaya

jaan se ziyaada rakkha jise ehtiyat se

wirse mein jo mila tha wo tohfa bikhar gaya

tufan-e-yaad-e-raftagan itna shadid tha

ashkon se meri aankh ka tara bikhar gaya