gardan mein hain wo bahen gardish mein hain paimane

gardan meñ haiñ vo bāheñ gardish meñ haiñ paimāne

kyā diin hai kyā duniyā shā.ir kī balā jaane

kuchh siikh sakeñ shāyad ābādiyāñ shahroñ se

ai rāh-ravo Thahro kuchh kahte haiñ vīrāne

mutrib vo uThe parde saaqī vo khule uqde

haañ yuuñ hī damādam de paimānoñ pe paimāne

ham ishq se kyā vāqif vāqif haiñ to sirf itnā

āġhāz halākat hai anjām ḳhudā jaane

jo ġhuncha-o-shabnam the kal raat ke hoñToñ par

ab sub.h ke kānoñ par nashtar haiñ vo afsāne

ai 'josh' ulajhtā hai kyoñ shaiḳh-e-subuk-sar se

vo ishq ko kyā samjhe vo husn ko kyā jaane

gardan mein hain wo bahen gardish mein hain paimane

kya din hai kya duniya shair ki bala jaane

kuchh sikh saken shayad aabaadiyan shahron se

ai rah-rawo Thahro kuchh kahte hain virane

mutrib wo uThe parde saqi wo khule uqde

han yun hi damadam de paimanon pe paimane

hum ishq se kya waqif waqif hain to sirf itna

aaghaz halakat hai anjam KHuda jaane

jo ghuncha-o-shabnam the kal raat ke honTon par

ab subh ke kanon par nashtar hain wo afsane

ai 'josh' ulajhta hai kyon shaiKH-e-subuk-sar se

wo ishq ko kya samjhe wo husn ko kya jaane