gardish-e-dasht-e-tamanna se mila kuchh bhi nahin

gardish-e-dasht-e-tamannā se milā kuchh bhī nahīñ

ġhalġhala hone kā sunte the huā kuchh bhī nahīñ

har haqīqat vāhima hai vāhima kuchh bhī nahīñ

dekhne meñ sab ḳhudā hai aur ḳhudā kuchh bhī nahīñ

jazba-e-ta.amīr meñ ik ḳhvāhish-e-taḳhrīb thī

kuchh banānā thā use lekin banā kuchh bhī nahīñ

jab se chīzoñ kī haqīqat se huā huuñ āshnā

dekhtā huuñ par dikhātā aa.ina kuchh bhī nahīñ

lauh ik mahfūz hai aur is liye mahfūz hai

us ne apne haath se is par likhā kuchh bhī nahīñ

aks hairat-gāh meñ bikhre hue haiñ har taraf

jabki hairat-gāh meñ mere sivā kuchh bhī nahīñ

gardish-e-dasht-e-tamanna se mila kuchh bhi nahin

ghalghala hone ka sunte the hua kuchh bhi nahin

har haqiqat wahima hai wahima kuchh bhi nahin

dekhne mein sab KHuda hai aur KHuda kuchh bhi nahin

jazba-e-tamir mein ek KHwahish-e-taKHrib thi

kuchh banana tha use lekin bana kuchh bhi nahin

jab se chizon ki haqiqat se hua hun aashna

dekhta hun par dikhata aaina kuchh bhi nahin

lauh ek mahfuz hai aur is liye mahfuz hai

us ne apne hath se is par likha kuchh bhi nahin

aks hairat-gah mein bikhre hue hain har taraf

jabki hairat-gah mein mere siwa kuchh bhi nahin