gardish-e-jam bhi hai gardish-e-ayyam ke sath

gardish-e-jām bhī hai gardish-e-ayyām ke saath

zindagī raqs meñ hai sāqī-e-gulfām ke saath

ai mirī ishrat-e-rafta kī sunahrī tārīḳh

maiñ ne dekhā hai tujhe gardish-e-ayyām ke saath

hasrat-e-dīd to nikle kisī sūrat qāsid

merī āñkhoñ ko bhī le jā mire paiġhām ke saath

vo mirā qissa-e-ġham sunñe se pahle bole

dekh aa.e na mirā naam tire naam ke saath

dast-e-sāqī meñ vo jaam aaya vo sūraj ubhrā

ik na.ī sub.h nazar aa.ī na.ī shaam ke saath

khul ke gesū ruḳh-e-jānāñ pe jo lahrāne lage

raushnī sub.h kī Takrāne lagī shaam ke saath

nām-levā bhī to hogā na koī bād-e-'muhib'

ḳhatm hai terā fasāna mire anjām ke baad

gardish-e-jam bhi hai gardish-e-ayyam ke sath

zindagi raqs mein hai saqi-e-gulfam ke sath

ai meri ishrat-e-rafta ki sunahri tariKH

main ne dekha hai tujhe gardish-e-ayyam ke sath

hasrat-e-did to nikle kisi surat qasid

meri aankhon ko bhi le ja mere paigham ke sath

wo mera qissa-e-gham sunne se pahle bole

dekh aae na mera nam tere nam ke sath

dast-e-saqi mein wo jam aaya wo suraj ubhra

ek nai subh nazar aai nai sham ke sath

khul ke gesu ruKH-e-jaanan pe jo lahrane lage

raushni subh ki Takrane lagi sham ke sath

nam-lewa bhi to hoga na koi baad-e-'muhib'

KHatm hai tera fasana mere anjam ke baad