gardish-e-mai ka is par na hoga asar mast aankhon ka jadu jise yaad hai

gardish-e-mai kā is par na hogā asar mast āñkhoñ kā jaadū jise yaad hai

vo nasīm-e-gulistāñ se bahlegā kyā tere āñchal kī ḳhushbū jise yaad hai

tishnagī kī vo shiddat ko bhūlegā kyā dhuup kī vo tamāzat ko bhūlegā kyā

terī be-faiz āñkheñ jise yaad haiñ terā be-sāya gesū jise yaad hai

koī mumtāz hai aur na shāh-e-jahāñ soz aur saaz hai kuchh alag hī yahāñ

tāj-mahaloñ ke vo ḳhvāb dekhegā kyā sañg-e-marmar kā zaanū jise yaad hai

us ko dukh-dard koī chhalegā nahīñ us kī duniyā kā sūraj Dhalegā nahīñ

tere bachpan kī ḳhushiyāñ jise yaad haiñ tere dāman kā jugnū jise yaad hai

ai 'alīm' āfatoñ ke ye lashkar haiñ kyā ek mahshar nahīñ laakh mahshar haiñ kyā

us ko fitnoñ kī parvāh bilkul nahīñ tirā ik ek ghuñghrū jise yaad hai

gardish-e-mai ka is par na hoga asar mast aankhon ka jadu jise yaad hai

wo nasim-e-gulistan se bahlega kya tere aanchal ki KHushbu jise yaad hai

tishnagi ki wo shiddat ko bhulega kya dhup ki wo tamazat ko bhulega kya

teri be-faiz aankhen jise yaad hain tera be-saya gesu jise yaad hai

koi mumtaz hai aur na shah-e-jahan soz aur saz hai kuchh alag hi yahan

taj-mahalon ke wo KHwab dekhega kya sang-e-marmar ka zanu jise yaad hai

us ko dukh-dard koi chhalega nahin us ki duniya ka suraj Dhalega nahin

tere bachpan ki KHushiyan jise yaad hain tere daman ka jugnu jise yaad hai

ai 'alim' aafaton ke ye lashkar hain kya ek mahshar nahin lakh mahshar hain kya

us ko fitnon ki parwah bilkul nahin tera ek ek ghunghru jise yaad hai