gardish-e-waqt ka manzar nahin dekha jata

gardish-e-vaqt kā manzar nahīñ dekhā jaatā

yaar ke haath meñ ḳhanjar nahīñ dekhā jaatā

koī ruḳhsat kare aur aañkh meñ aañsū bhī na hoñ

aise lamhāt meñ muḌ kar nahīñ dekhā jaatā

ye rivāyat mire purkhoñ se chalī aa.ī hai

'ishq meñ yaar ko chhū kar nahīñ dekhā jaatā

ai ḳhudā shahr ke hākim ko hidāyat de de

chār-sū 'arsa-e-mahshar nahīñ dekhā jaatā

ham ki dam toḌtī qadroñ ke amiiñ haiñ ham se

bint-e-havvā kā khulā sar nahīñ dekhā jaatā

haa.e us husn-e-balā-ḳhez kī tāsīr 'umair'

der tak us ko barābar nahīñ dekhā jaatā

gardish-e-waqt ka manzar nahin dekha jata

yar ke hath mein KHanjar nahin dekha jata

koi ruKHsat kare aur aankh mein aansu bhi na hon

aise lamhat mein muD kar nahin dekha jata

ye riwayat mere purkhon se chali aai hai

'ishq mein yar ko chhu kar nahin dekha jata

ai KHuda shahr ke hakim ko hidayat de de

chaar-su 'arsa-e-mahshar nahin dekha jata

hum ki dam toDti qadron ke amin hain hum se

bint-e-hawwa ka khula sar nahin dekha jata

hae us husn-e-bala-KHez ki tasir 'umair'

der tak us ko barabar nahin dekha jata