gardish-e-waqt ki raftar se baaten ki hain

gardish-e-vaqt kī raftār se bāteñ kī haiñ

ham ne jab gesū-e-ḳhamdār se bāteñ kī haiñ

muddatoñ shab kī siyāhī se patā pūchhā hai

tab kahīñ sub.h ke āsār se bāteñ kī haiñ

āzar-e-vaqt ke hāthoñ se girā hai tesha

ham ne jab 'aks-e-ruḳh-e-yār se bāteñ kī haiñ

kashtiyāñ apnī jalāne kā jab aaya hai ḳhayāl

jazba-e-sidq kī patvār se bāteñ kī haiñ

aaj ke daur-e-siyāsat ko nazar meñ rakh kar

sāqī-e-vaqt ne mai-ḳhvār se bāteñ kī haiñ

jab bhī chāhā hai husūl-e-sanad-e-haq-goī

ahl-e-haq ne rasan-o-dār se bāteñ kī haiñ

gardish-e-waqt ki raftar se baaten ki hain

hum ne jab gesu-e-KHamdar se baaten ki hain

muddaton shab ki siyahi se pata puchha hai

tab kahin subh ke aasar se baaten ki hain

aazar-e-waqt ke hathon se gira hai tesha

hum ne jab 'aks-e-ruKH-e-yar se baaten ki hain

kashtiyan apni jalane ka jab aaya hai KHayal

jazba-e-sidq ki patwar se baaten ki hain

aaj ke daur-e-siyasat ko nazar mein rakh kar

saqi-e-waqt ne mai-KHwar se baaten ki hain

jab bhi chaha hai husul-e-sanad-e-haq-goi

ahl-e-haq ne rasan-o-dar se baaten ki hain