gardishon se yun ubhar jaane ko ji chahta hai

gardishoñ se yuuñ ubhar jaane ko jī chāhtā hai

shaam se pahle hī ghar jaane ko jī chāhtā hai

tum ko rakhnā hai rakho tark-e-ta.alluq kā bharam

merā va.ade se mukar jaane ko jī chāhtā hai

mulk-o-maz.hab ke qavānīn to sar āñkhoñ par

ishq meñ had se guzar jaane ko jī chāhtā hai

farsh-e-duniyā pe maiñ muddat se jiyā huuñ ab to

chāñd-tāroñ se guzar jaane ko jī chāhtā hai

baad marne ke mujhe yaad rakhe ye duniyā

kaam kuchh aise bhī kar jaane ko jī chāhtā hai

zindagī dī hai usī ne vahī māregā magar

in dinoñ yuuñ hai ki mar jaane ko jī chāhtā hai

bin bulāvā maiñ kabhī 'nazr' na jaatā huuñ kahīñ

bazm hai un kī magar jaane ko jī chāhtā hai

gardishon se yun ubhar jaane ko ji chahta hai

sham se pahle hi ghar jaane ko ji chahta hai

tum ko rakhna hai rakho tark-e-talluq ka bharam

mera wade se mukar jaane ko ji chahta hai

mulk-o-mazhab ke qawanin to sar aankhon par

ishq mein had se guzar jaane ko ji chahta hai

farsh-e-duniya pe main muddat se jiya hun ab to

chand-taron se guzar jaane ko ji chahta hai

baad marne ke mujhe yaad rakhe ye duniya

kaam kuchh aise bhi kar jaane ko ji chahta hai

zindagi di hai usi ne wahi marega magar

in dinon yun hai ki mar jaane ko ji chahta hai

bin bulawa main kabhi 'nazr' na jata hun kahin

bazm hai un ki magar jaane ko ji chahta hai