gardun pe chand bujh gaya gham ki faza ke baad

gardūñ pe chāñd bujh gayā ġham kī fazā ke baa'd

zulmat tamām chhā ga.ī shām-e-balā ke baa'd

ik be-karāñ vujūd kā hissa hai ye bashar

insāñ bahut 'azīm hai lekin ḳhudā ke baa'd

banjar zamīñ pe ḳhūn-e-riyāzat bahā gayā

vo kaun thā ugā gayā paudā du'ā ke baa'd

mujh ko milā ke ḳhaak meñ vo kah rahe haiñ ye

hai ibtidā hamārī tirī intihā ke baa'd

chāhe zamāna mujh ko chaḌhā de salīb par

terā hī naam aa.egā lab par ḳhudā ke baa'd

kal raat mere shahr kā manzar 'ajīb thā

sab kuchh bahā ke le gayā dariyā havā ke baa'd

gardun pe chand bujh gaya gham ki faza ke ba'd

zulmat tamam chha gai sham-e-bala ke ba'd

ek be-karan wujud ka hissa hai ye bashar

insan bahut 'azim hai lekin KHuda ke ba'd

banjar zamin pe KHun-e-riyazat baha gaya

wo kaun tha uga gaya pauda du'a ke ba'd

mujh ko mila ke KHak mein wo kah rahe hain ye

hai ibtida hamari teri intiha ke ba'd

chahe zamana mujh ko chaDha de salib par

tera hi nam aaega lab par KHuda ke ba'd

kal raat mere shahr ka manzar 'ajib tha

sab kuchh baha ke le gaya dariya hawa ke ba'd