gareban dar gareban nukta-arai bhi hoti hai

garebāñ dar garebāñ nukta-ārā.ī bhī hotī hai

bahār aa.e to dīvānoñ kī rusvā.ī bhī hotī hai

ham un kī bazm tak jā hī pahuñchte haiñ kisī sūrat

agarche raah meñ dīvār-e-tanhā.ī bhī hotī hai

bikhartī hai vahī aksar ḳhizāñ-parvar bahāroñ meñ

chaman meñ jo kalī pahle se murjhā.ī bhī hotī hai

ba-nām-e-kufr-o-īmāñ be-muravvat haiñ jahāñ donoñ

vahāñ shaiḳh-o-barahman kī shanāsā.ī bhī hotī hai

chamaktī hai koī bijlī to sham'-e-rahguzar ban kar

nigāh-e-barham in kī kuchh to sharmā.ī bhī hotī hai

'qatīl' us dam bhī rahtā hai yahī ehsās-e-mahrūmī

jab un shānoñ pe zulfoñ kī ghaTā chhā.ī bhī hotī hai

gareban dar gareban nukta-arai bhi hoti hai

bahaar aae to diwanon ki ruswai bhi hoti hai

hum un ki bazm tak ja hi pahunchte hain kisi surat

agarche rah mein diwar-e-tanhai bhi hoti hai

bikharti hai wahi aksar KHizan-parwar bahaaron mein

chaman mein jo kali pahle se murjhai bhi hoti hai

ba-nam-e-kufr-o-iman be-murawwat hain jahan donon

wahan shaiKH-o-barahman ki shanasai bhi hoti hai

chamakti hai koi bijli to sham'-e-rahguzar ban kar

nigah-e-barham in ki kuchh to sharmai bhi hoti hai

'qatil' us dam bhi rahta hai yahi ehsas-e-mahrumi

jab un shanon pe zulfon ki ghaTa chhai bhi hoti hai